بو خلف ريال شيبة عمره 60 سنة، وعنده أحفاد اللي هم سيف 13 سنة في الصف الأول الإعدادي في مدرسة المهلب وشما 10 سنوات في الصف الرابع الابتدائي في مدرسة آمنة بنت وهب للبنات ورفيعة 7 سنوات في نفس مدرسة شما وهي في الصف الأول الابتدائي وعبدالله 5 سنوات بعده ياهل ما يسير المدرسة لأن هاذيج الأيام ماشي روضة.. بو خلف متعود يسولف على أحفاده اعيال ولده خلف عقب صلاة التراويح في شهر رمضان.. طبعاً نحن الحينة في عام 1973م.. بو خلف ساكن ويا ولده خلف في بيت عربي في منطقة الحمرية بدبي.. خلونا نسمع سوالف بو خلف ونشوف عن شو يخبر أحفاده
دخل بو خلف الميلس عقب ما صلى التراويح وكان وياه حفيده سيف وبعد إشويه دخلت عليهم شما ورفيعه وعبادي الصغير اللي كان ماسك قطوة وإيرها من ذيلها.
بو خلف: عبدالله.. عبيد (كان يوم يدلعه يسميه عبيد) فديتك أبويه مب زين تسوي جي في القطوة
عبادي: يدي.. هاي كلت السمج اليوم
بو خلف وهو يأخذ عبادي في حضنه
بو خلف: عبيد يا ولدي حرام يمكن عندها إعيال وتأخذ الأكل توديه حقهم
عبادي: بأضربها هي وعيالها
بو خلف وهو يضحك: ظاهر شري على أبوك.. ما خلا قطوة في الفريج إلا فلعها وإلا علقها وضربها
شما: يدي خبرنا عن أبويه.. صدق كان شري؟
بو خلف: والله يا بنتي يطولي في عمرج كل واحد يوم صغير لازم يكون شيطان وفوضوي وإلا ما بيروم يدبر عمره يوم بيكبر
سواف: عيل يدي إنت تقولي لا تستوي شيطان وأبا أشوفك آدمي
بو خلف: هيه يا ولدي أنا أقولك جي.. وأباك صدق تستوي آدمي وتتسنع وما تسترغد ويا عيال الزطوط اللي بييبون لك البلاوي والمصايب
سواف: يدي إنزين وأبويه ما كانوا عنده ربع يعني؟
بو خلف: كانوا عنده ربع أكيد.. لكنهم عيال عرب أحشام ما يسوون الشينه.. ما أحيد مره حد دق الباب علينا وقال ولدكم شيطان وإلا مسوي شي غلط
شما: يدي يعني أبويه ما كان شيطان؟
بو خلف: لا يا بنتي أنا ما قلت جي.. أبوج حاله من حال اللي كانوا في عمره.. كان شيطان لكنه ما كان يسوي شي يضره ويسبب له مشاكل أو يضر الغير
رفيعه: يدي أبويه كم كان عمره يوم أول مرة صام رمضا؟
بو خلف: والله يا رفوعه يا بنتي اللي أحيده إنه كان ياهل يعني جي يمكن يكون ثمان وإلا تسع.. بس في البداية أحيده كان يشرب ماي من ورانا وأنا مرة كنت راد من صلاة الظهر وزخيته يشرب ماي من (الحِب) ومرغته بالمطرق لين ما قال بس
الكل إهنيه ضحك حتى بو خلف ضحك يوم إتذكر ولده خلف وإشقايل ضربه
شما: وبعدين يدي شو إستوى؟
بو خلف: بخبركم يا عيالي.. صلوا على النبي محمد
الكل: عليه أفضل الصلاة والسلام
بو خلف: أفلحتوا
اعتدل بو خلف في يلسته وقال
بو خلف: عقب ما ضربت ولدي خلف حبسته في الزويّة وكانت أمه تصيح وتقولي حرام عليك هذا ياهل ما سوى شي.. كنت أرد وأقول لها الياهل لازم يتعلم ولو ما ضربناه وأدبناه بيسوي أشد عن جي.. وتميت حابسنه لين أذن المغرب
رفيعه: حرام يدي.. حليله أبويه ما يستاهل والله
بو خلف: لا يا رفيعه مب حرام.. ومن هاك اليوم والحبس اللي حبسته تعلم أبوج إشقايل يحافظ على صلاته وصيامه ويجابل الفروض
شما: إشقايل يدي؟
بو خلف: يوم دق المدفع وأذن المغرب سرت وفجيته وقلت له تعال إتعشى.. قالي أبويه أنا صايم يعني بأفطر.. قلت له جب إنته ما صمت.. إنته فطرت لأنك شربت ماي وهذا ما يسمونه صيام.. الصيام مب بس اتيوع بعمرك والسلام.. الصيام هو الصيام عن كل شي غلط وإنته سويت اليوم شي كبير ما بسامحك عليه..
تم يصيح ويحبني على راسي ويستسمح مني لين ما رضيت عليه لأنه حلف لي وقال آخر مره وما بيعيدها بعد هالمره.. وعقب ما فطرنا وسرنا المسيد وصلينا العشا والتراويح وعينا خير.. ردينا البيت ويلست وياه في الميلس.. وبديت أرمسه عن الصوم وأفضال الصيام على صحة الناس.. عقب خبرته عن هاي القصة وأباكم تسمعوني زين يا عيالي عشان تعرفون أمور دينكم
الكل: إن شاء الله يدي تفضل قول
بو خلف: كنا سلمكم الله يهال صغار شراتكم.. وكان ويانا واحد ينقاله صلوح مسواج.. هذا ولد كبرنا أو أكبر بسنه وإلا كمٍ شهر.. صلوح سلمكم الله ما كان يصوم.. وكم كان يحصل له هزاب من أبوه وأمه وينضرب لكنه ما يتوب.. وكم نحن نصحناه مع إنه كان أكبر عنا بسنه لكنه كان يضحك علينا ويقول لنا مب لازم أصوم خلوا الصيام حقكم..
وفي يوم من الأيام كنا نلعب في الليل وهذا كان عقب صلاة العشا.. كنا نلعب في الفريج يوريد (لعبة شعبية يلعبها الأولاد قديماً).. وكان صلوح ويانا.. هذا طبعاً عقب شهر رمضان.. المهم صلوح كان في فريقنا وركضنا عشان نندس عن الفريق الثاني.. سرنا سلمكم الله صوب زريبة كانت بعيدة إشويه عن الفريج وقلنا إهنيه محد بيشوفنا ولا بيحصلنا.. كنا نحن 4.. أنا وصلوح وويانا بعد 2..
يلسنا في الزريبه وكان القمر غايب وظلام ما ينشاف شي.. مرة وحدة سمعنا صرخة من صوب صلوح وتم يركض.. نحن زغنا وظهرنا نركض وراه وهو يركض ما يدري وين يسير.. المهم لحقناه وإلا يطيح على الأرض وتم يزبِّد ويروِّن ويبغم وهو طايح على الأرض تقولون ملدوغ.. نحن زغنا وركضنا جدا الفريج ندوِّر على رياييل كبار عشان إيون ويشوفون صلوح شو استوى فيه.. لقينا رياييل وخبرناهم ويو يركضون بسرعة وشلوا صلوح وودوه البيت..
وتمينا نحن زايغين وما ندري شو استوى فيه.. أبوه يانا وقال لنا شو استوى في صلوح وخبرناه عن السالفة.. نهار ثاني شفنا صلوح مودينه عند مطوع.. صلوح كان شكله مصفّر وينتفض ويباغم وكان أبوه رابطنه بحبل لأنه في الليل عقب ما وصلوه الرياييل البيت بغا يشرد عنهم من البيت ويظهر.. صلوح كان ويهه معواي وريوله وارمه وبطنه منتفخ وعيونه كانن حمّر تقولون بيقطر منهن الدم.. أبوه وعمومته ودوه عند مطوع في فريج المرر قرا عليه وقال إن أرضي كافخنه.. وتم يقرا عليه 40 يوم لين ما ظهر الشيطان اللي مستلبسنه.. وقال لهم المطوع إن الشيطان هذا كافر مب مسلم..
يوم شاف صلوح ما يصلي ولا يصوم كان سهل إنه يستلبسه ودخل في جسمه وإستلبسه وخبل به.. ومن عقبها صلوح ما يودر فرض ولا يمر عليه رمضان إلا صامه كله.. صلوح من عقب هالسالفة غدا ريال وتم ينصح الناس بالصلاة والإيمان.. والعام الله يغفر له غاب عن الدنيا.
الكل: الله يرحمه ويغفر له
بو خلف: الله يرحمه ويرحم أموات كافة المسليمن.. هاي يا عيالي سالفة من السوالف اللي استوت جدامي وأنا خبرتكم عنها عشان تحافظون على فروضكم وإيمانكم.. ترى الانسان اللي ما يجابل ربه الشيطان يسكنه لأن قلبه ما فيه ذرة إيمان عشان جي الشيطان ما بيخاف منه..
والشياطين نحن ما نشوفهم لكنهم يشوفونا ويعرفون اللي يصلي ومحابل دينه من اللي يلعب ولا عليه من شي.
سواف: صدقت يدي.. إن شاء الله ما بنودر فروضنا وبنجابل صلاتنا وإيمانا
بو خلف: جي أباك يا بويه.. مالك غير دينك وإيمانك الله يبارك فيك.. والحينه يا عيال أنا بأرتاح إشوي لين وقت السحور.. باخذ لي غفوة إشويه
وظهروا العيال عن يدهم بو خلف على أمل يشوفونه نهار ثاني عقب صلاة التراويح عشان يسولف عليهم سوالف يديده.