بو خلف ريال شيبة عمره 60 سنة، وعنده أحفاد اللي هم سيف 13 سنة في الصف الأول الإعدادي في مدرسة المهلب وشما 10 سنوات في الصف الرابع الابتدائي في مدرسة آمنة بنت وهب للبنات ورفيعة 7 سنوات في نفس مدرسة شما وهي في الصف الأول الابتدائي وعبدالله 5 سنوات بعده ياهل ما يسير المدرسة لأن هاذيج الأيام ماشي روضة.. بو خلف متعود يسولف على أحفاده اعيال ولده خلف عقب صلاة التراويح في شهر رمضان.. طبعاً نحن الحينة في عام 1973م.. بو خلف ساكن ويا ولده خلف في بيت عربي في منطقة الحمرية بدبي.. خلونا نسمع سوالف بو خلف ونشوف عن شو يخبر أحفاده
دخل بو خلف الميلس عقب صلاة التراويح وكان معصباً.. كان ماسكاً المطرق في إيديه ويمشي على طول الميلس.. دخلن عليه البنات شما ورفيعه وسلمن على يدهن اللي كان باينه عليه العصبية.
بو خلف: وين سواف الحمار؟
شما وهي متعجبة: جيه يدي؟.. هو ما سار وياك المسيد عشان تصلون العشاء والتراويح؟
بو خلف: سار ويايه الصلاة ها؟.. صل ماء ويهه.. جليل الحيا.. خله إيي أنا براويه.. إن ما مرغته بهالمطرق اللي في إيديه أنا مب بو خلف.
شما: يدي !.. شو سالفة؟
و إهنيه دخل سيف وسلم نش بو خلف وعلى طول سار له وتم يغسله بالمطرق اللي في إيديه وسواف يركض على طول الميلس ويضحك وهو ما يدري شو السالفة.
سواف: يدي بلاك؟.. ليش تضربني؟.. إنزين قولي شو سويت عشان أنضرب؟
بو خلف وهو يرفع المطرق ويبا يضرب سواف اللي كان يشرد عنه وبو خلف مب رايم يلحقه وسواف يضحك وبو خلف مقهور منه.
بو خلف: شو سويت يا جليل الحيا؟.. يا اليهودي.. صيام على الخالي.. لا صلاة ولا إيمان عنلاتك.
سواف: حرام عليك يدي والله إني صليت وراك.
بو خلف: جذوب غربلك الله.. يقول صليت.. لا تجذب يا الخايس.. لا تتحراني شويبه وما أشوف عدل في الليل تقول بقص عليه.. أنا أبيعك وأشتريك يا الحمار.. أنا بو خلف وإذا ما تعرفني روح إتخبر عني الرياييل بيقولون لك منو بو خلف.
سواف: يدي.. صدقني أنا صليت وراك.
بو خلف: يا سواف يا الحمار قلت لك عن الجذب.. إنته دشيت المسيد وظهرت تتحراني ما شفتك.. من شفتك ظهرت أنا نشيت من مكاني وسرت وراك.. وإلا أشوفك واقف ويا عدول متوه تسولفون.. خسك الله إنته وياه.
سواف إهنيه ضحك يوم سمع يده يقول عدول متوه.
سواف: يدي إنته من وين تعرف عدول متوه؟.. والله إنك إزقرت يا بو خلف
بو خلف: إزقرت في عينك يا السبال.. غصباً عنك إزقرت عيل شراتك عنلات هالشيفه.. تتحراني غافل عنك ها؟.. شفتك يوم واقف ويا هالحمار عدول متوه وعقب ما رمت أتأخر لأن الإمام أقام الصلاة وإلا كنت بأتبعك وبعرف أقصاك.
سواف: يدي صح كلامك.. أنا ظهرت وسرت وقفت أسولف ويا عدول متوه.. بس والله من أقام الإمام الصلاة أنا وعدول دشينا المسيد وصلينا.. حتى بقولك إنته وين كنت واقفاً.
بو خلف: يالله قول يا السبال خل نسمع آخر جذباتك.
سواف: إنته كنت واقفا سلمك الله في الصف الثاني على يسار الإمام حتى كان يقف إحذالك في الصف بروك المسهج.
بو خلف: إنطب طبك الله.. سم الرياييل بأساميها يا التيس.. اسمه مبارك ولد ربيع مب بروك المسهج.. محد مسهج غيرك إنته وربعك هالخمه.. سبال واحد.
سواف: إنزين يدي خلاص.. مبارك ولد ربيع لا تزعل.. بس والله يا يدي صليت ولو ما دشيت المسيد مرة ثانية إشقايل بعرف وين واقف.
طبعاً بو خلف صدق سواف يوم رمس جي لكنه حب يعطيه درس للمحافظة على الصلاة.
بو خلف: جذاب.. إنته الله بيجلبك سبال
لأنك عاصي ربك.
سواف: حرام عليك يدي والله ما عصيت
بو خلف: يا سواف أنا يوم كان عمري 7 سنين كنت ما أودر فرض إلا وأصليه في المسيد.. أبويه كان يوعيني من الغبشه عشان صلاة الفجر ومن هاييج السنين لين اليوم وأنا ملتزم بطاعة ربي وأصلي في المسيد.. لأن ما كنت أعرف ربع خمه شرات ربعك.. إلا عدول متوه وخلفون همباه.
إهنيه سواف نقع من الضحك على يده لأنه يعرف أسامي كل ربعه.
سواف: بو خلف.. والله إنك عجيب.. عدول متوه وسمعناها وعديناها.. اشقايل عرفت اسم خلفون همباه؟
بو خلف: بعد إنته منو بيكونون ربعك يعني؟.. إلا همباه وسحناه ومتوه وإحمسه وقرفاه.
إهنيه الكل ضحك حتى شما ورفيعه.
شما: يدي.. نباك تسولف لنا عن سوالف لأول.. تولهنا على سوالفك يدي.
رفيعه: هيه والله يدي.. الله يخليك.. سولف وخبرنا.. عشان خاطري.
بو خلف: فديت خاطرج أمايه.. إن شاء الله بخبركم.. بس هالحمار ما خلا فيني أي عقل اليوم من سوالفه وسواياه.. جليل الحيا اللي مب متربي.
سواف: خلاص يدي.. أوعدك من اليوم وساير بسير المسيد وياك وبوقف إحذالك في الصلاة.. كم يد عندي أنا.. إلا هو واحد.
بو خلف: هيه قص عليه.. قالوا لك أنا برهوم ولد عذيجه يالس تقص عليه.
سواف: يدي أخافك إربيعنا ونحن ما ندري.. وإلا إشقايل تعرف نحن شو نسمي بعض؟
بو خلف: أنا أعرف كل شي ولا فيه شي يطوفني.. وحتى إنته يسمونك سواف الأملح.
إهينه الكل ضحك حتى سيف طاح على بطنه وهو ميت من الضحك.
شما: فديت يدي يا ربي محلاة رمسته.. يدي والله إنك راعي سوالف.
بو خلف: فديتج إنتي والله.. إنتي اللي محد يسواج.
رفيعه وهي تسوي عمرها زعلانه.
رفيعه: بس شموه محد يسواها؟
بو خلف: لا فديتج.. حتى إنتي محد يسواج.
سواف: إنزين يدي.. يالله سولف علينا سوالف لأول.
بو خلف: صلوا على النبي.
الكل: اللهم صلي وسلم عليه.
بو خلف: أفلحتوا.
إعتدل بو خلف في يلسته وبدا يسولف.
بو خلف: اليوم برمسكم عن الصلاة يا عيالي.. أحيد يوم كان عمري 9 سنين.. مديت الغوص على المحمل اللي أبويه كان عليه نوخذا.. كنا في الشتا.. مطر وبرق ورعد وبرد.. وكان ويانا على المحمل شاب توه صغير عمره يمكن 18 وإلا 19 سنه.. هالريال ينقال له راشد.. أبوه طرشه على المحمل ويانا عشان يتعلم من البحر لأنه كان كسول ودومه راقد.. ماشي من وراه منفعه.. نش أبويه وخذ أجر الله فيه ووداه ويانا على المحمل.. المهم مشينا كم يوم في المحمل والبحريه كانوا ماشاء الله عليهم كل واحد منهم هاب ريح محد يلحجه في الشغل..
والصغاريه اللي كبري كانوا يشتغلون على المحمل ينظفون ويخمون ويسوون الأكل ويعاونون البحريه والغيص.. الكل كان على المحمل يشتغل إلا رشود دوم أبويه يفاتن عليه ويصارخ ويقوله رشود قوم إشتغل لكنه كان كسول عشان جي أبويه كان دوم يضربه ويجبره على الشغل.. حتى الصلاة ما كان يصلي ويانا..
كنا نحن الصغاريه نسميه اليهودي لأنه ما كان يصلي.. حتى كان ويايه ولد صغير في نفس عمري ينقاله محمد سار مره صوبه وقاله إستح على ويهك نحن يهال ونصلي ويا الجماعة على المحمل وإنته شو كبرك ما تشتغل.. نش جان يضربه.. سار محمد وخبر أبويه وأبويه نش وضرب رشود وتم يفاتن عليه
شما: كمل يدي.. كل
بو خلف: سواف صب لي قهوة
نش سيف وسار صب قهوة حق يده بو خلف وتم يقهويه لين ما هز الفنيان نش سيف وحط الدلة والفنايين مكانها ورد يلس يسمع سوالف يده
بو خلف: بعدين سلمكم الله.. مرت الأيام ونحن في البحر ورشود على عادته أبد ما إتغير.. يحاولون يوعونه لصلاة الفجر لكنه ما يطيع ينش.. يبونه يتعلم له شغله لكنه ما كان يبا يشتغل.. كله يبا يرقد.. ياكل ويشرب ويرقد..
البحريه اللي ويا أبويه على المحمل قالوا لأبويه إمنع عنه الأكل والشرب لكن أبويه قلبه طيب قالهم لا هذا أمانة عندي وباجر لابد يتعلم والله بيهديه.. مرت الأيام ورشود على نفس الحالة لين في يوم من الأيام كنا في الليل وكان المحمل واقف والكل رقود على ظهر المحمل واللي في الخن (الخن هو الفتحة التي في السفينة ينزل منها البحارة الى الطبقة السفلى من السفينة وهي كذلك تستخدم كغرفة للمؤونة)..
وكانوا البحرية يرتاحون والغيص بينشون قبل الفجر بإشوي عشان يغوصون فكانوا يحتاجون للراحة.. مره وحده ما وعينا إلا على صوت هوا ودولاب والدنيا معتفسه.. نشوا اللي على المحمل كلهم يقرون ويصلون والكل كان خايف ويدعي ربه واللي يصلي..
الماي دخل المحمل وكانوا البحرية يتحركون في المحمل كله ويشيلون ماي البحر من المحمل ويردونه للبحر لأن المحمل بدا يغوص إشوي إشوي والكل يقول يا ستار إستر.. الدنيا ظلام ولا هناك قمر ينور المكان ومحد يقدر يولع الفنر (مصدر الإضاءة الوحيد في تلك الفترة) لأن الهوا كان قوي وشديد..
وفجأة إنكسر السكان ودار المحمل حول نفسه وإنكسرت الدفة وعقبها الدقل وتمينا يا الله يا شافع يا دافع وندعي ربنا ينجينا.. ورشود هو الوحيد اللي كان واقف ووخايف حتى ما كان يدعي ربه إنه ينجينا.. يوم كنا ندعي هو كان واقف ينتفض من الخوف وثمه مسكرنه ونحن نقول يا رشود إدعي ربك ينجينا قول شي وهو ساكت ولا حتى قال يا الله.. وإشوي إشوي نزل المحمل للبحر وغرق !
سواف: يدي.. غرق المحمل؟
بو خلف: هيه نعم غرق
شما: كمل يدي.. كمل الله يخليك
بو خلف: يوم غرق المحمل كل واحد تعلق بلوح وإلا درام شافه جدامه.. كل واحد يتعلق في أي شي المهم ما يغرق.. والقوي تم يسبح لكن ما كنا نعرف وين نحن.. وأبويه شفته يصرخ باسمي جان أسير صوبه مسكني وحطني على ظهره وكل واحد من البحريه والغيص حط ياهل على ظهره عشان اليهال ما فيهم شده على البحر..
وتمينا جي وقت طويل لين ما بانت الشيفه الحمد لله وشفنا السيفه تبان قريبه منا.. سبحنا للسيفه والحمد لله إن الله نجانا.. ويوم سرنا نشوف منو الناقص فينا لقينا رشود محد !.. يعني رشود غرق
سواف: حليله والله رشود.. الله يرحمه ويغفر له
بو خلف: إصبر إشوي خلني أكمل رمستي
سواف: إن شاء الله يدي.. كمل
بو خلف: أبويه هو النوخذا يعني المسؤول عن اللي في المحمل.. قال حق كم واحد من الغيص خلونا نرد نسبح وندور رشود.. وساروا يدورون رشود في البحر اللي بدا يهدأ إشوي وظهرت الشمس وتموا قوم أبويه يدورون لكنهم ما لقوا رشود وردوا قالوا أكيد رشود غرق
شما: لا حول الله.. الله يرحمه
رفيعه: حليله والله.. ما يستاهل
بو خلف: نشينا وتمينا نتصدد نشوف عمارنا وين وتمينا نتصدد يمين ويسار ومشينا على الأرض اللي كانت عبارة عن حصل الجبال لين ما وصلنا لبقعة رمل وعرفنا إن نحن في يزيره.. دورنا مكان فيه ماي لقينا طوي جديم نزل واحد من البحريه يطالع الطوي شاف فيه ماي حلو ونظيف..
دولنا دلو ما لقينا وفي الأخير لقينا جدر عود من جدور المحمل كان ميودنه واحد من البحريه وسويناه دلو ويبنا ماي من الطوي وشربنا وعينا خير.. وتمينا يلوس في هاييج البقعة احذال الطوي نرتاح لين وقت الظهر.. نشينا وصلينا الظهر ودعينا ربنا يرحمنا وشكرناه إنه نجانا وسرنا صوب السيفه يمكن نشوف لنج وإلا محمل مار من نفس البقعة يودينا وياه..
تمينا لين جريب العصر وإلا نشوف لنج كبير ياي صوب اليزيره تمينا نأشر عليه وشفنا يتجدم من اليزيره لين أذن العصر ونشينا وصلينا وعينا خير وإلا اللنج يوصل لليزيره.. نزلوا منه كم واحد من البحريه اللي عليه وعرفناهم لأنهم ربعنا من دبي.. وإلا نشوف وياهم رشود وهو يأشر علينا ويصيح وركض صوب أبويه ولوى عليه وحب راسه وإيديه وهو يصيح.. ما صدقنا إن رشود عايش لأن ما لقيناه في البحر.
سواف: حليله رشود يعني ما مات؟
شما ورفيعه: الحمد لله
بو خلف: نشينا وسرنا صوب اللنج وركبنا وسار رشود صوب أبويه ويلس يسولف عليه شو اللي استواله
قال رشود: عقب ما طبع اللنج أنا ما عرفت شو أسوي وتميت أسبح وأنا أصيح لأني عرفت إني بموت أكيد.. تذكرتكم يوم كنتوا تقولون لي قوم إدعي ربك عشان ينجينا.. تذكرتكم يوم كنتوا تقولون لي نش صل ويانا جماعة وأنا كنت ما أصلي لا جماعة ولا بروحي.. وعرفت إني بموت أكيد لأني ما إتذكرت ربي يوم كنت مرتاح وما فيني شي وين ربي بيذكرني يوم أنا في مشكلة ومتوهق.. وتذكرت إني سمعت المطوع مال المسيد اللي احذال بيتنا يقول إن الله غفور رحيم..
قلت في نفسي يعني معقولة إن الله ممكن غفور ورحيم فيني وأنا اللي ما أصلي ولا أذكره.. قلت بأدعي ربي ينجيني وأنا في البحر وحلفت إن الله لو نجاني من الموت لأتم أصلي وأعبده طول عمري وأخوز عني الهيازله والكسل.. لكني إستحيت أقول يا رب إنقذني وساعدني.. إستحيت أرفع راسي للسما.. إستحيت من ربي وما عرفت شو أقول..
وتميت أفكر وأقول ربي هو اللي خلقني وأنا صادق الحينه ويا ربي.. لو الله نجاني من الموت ما برد للكسل وبصلي وبصوم ولا بودر فرض.. رفعت راسي وقلت يا رب.. يا رب تنقذني وتردني لأهلي ولربعي ولبلادي.. أوعدك يا ربي وأنا بين الحياة والموت لو نجيتني ما أترك فرض وطول العمر بصلي في المسيد وما بعصيك وبصوم.. وتميت أدعي وأنا أسبح وحسيت بعمري مب رايم أحرك ريولي لأنها بدت تتخدر وما وعيت وإلا مويه قوية يايه ورافعتني فوق ومنزلتني في القوع.. وتميت على هالحالة وأنا خايف وأقول يا رب يا رب يا رب ساعدني..
والمويه ترفعني وتنزلني وأنا من حلاة الروح نسيت إن ريولي بدت تتخدر وتميت أحاول يوم أنزل للقوع إني أصعد فوق لين ما شفت إحذالي لنج واللي فيها يأشرون عليه.. ما صدقت وتميت أصيح وفي الأخير إتجدموا مني وركبوني اللنج.. ما صدقت إني نجيت.. بعدين عقب ما إرتحت خبرت النوخذه بالقصة وقلت له أكيد إن حد منكم نجا وسبح صوب هاليزيره لأنها أقرب بقعة للمكان اللي غرق فيه المحمل.. ويينا صوبكم والحمد لله على سلامتكم
سواف: سبحان الله.. الله كريم صدق.. كريم بعباده.. مع إن رشود كان ريال ما يصلي ولا يدل الجبله لكن الله نجاه من الموت عشان يعرف إن الله غفور رحيم بعباده
بو خلف: هيه يا ولدي.. الله رحيم بعباده.. وخصه الريال التايب والصادق في توبته رب العالمين يوقف وياه ويعاونه.. والحينه يا سيف تدري منو رشود هذا؟
سواف: لا والله يدي ما أدري.. منو؟
بو خلف: مطوع مسيدنا.. راشد بن سالم
سواف: سبحان الله.. معقولة؟
بو خلف: هيه نعم معقولة يا ولدي.. ماشاء الله عليه راشد بن سالم من ردينا عقب ما غرقنا وهو مجابل المسيد طول الوقت وما يترك فرض وسار عند المطوع وختم القرآن واستوى مأذن في الفريج وعقب ما مطوع المسيد الله عطاك عمره استوى راشد بن سالم هو المطوع وجابل دينه وإيمانه
شما: والله يا يدي سالفة غاوية
بو خلف: قصدي من هاي السالفة أقول حق أخوج سيف إن الصلاة تنجي بن آدم من المصايب.. ورب العالمين دوم في عون المصلي واللي يدعيه واللي يطلبه.. ما أبا سواف يبتعد عن دينه وينسى ربه لأن ربه بينساه
سواف: إن شاء الله يدي.. أوعدك بصلي كل الفروض في المسيد
بو خلف: بارك الله فيك يا ولدي
رفيعه: يدي تعباناك ويانا اليوم وايد.. بنخليك ترتاح إشويه لين وقت السحور
بو خلف: ربي يحفظكم إن شاء الله.. وهالله هالله بعماركم.. وإنته يا سواف عن الشطانه والحواطه في الفريج بلا شغله.. سير إقرا لك كم آية خل ربك يرحمك
سواف: إن شاء الله يدي.. فالك طيب
و ظهروا الأولاد عن يدهم عشان يرتاح لين وقت السحور.