بو خلف ريال شيبة عمره 60 سنة، وعنده أحفاد اللي هم سيف 13 سنة في الصف الأول الإعدادي في مدرسة المهلب وشما 10 سنوات في الصف الرابع الابتدائي في مدرسة آمنة بنت وهب للبنات ورفيعة 7 سنوات في نفس مدرسة شما وهي في الصف الأول الابتدائي وعبدالله 5 سنوات بعده ياهل ما يسير المدرسة لأن هاذيج الأيام ماشي روضة.. بو خلف متعود يسولف على أحفاده اعيال ولده خلف عقب صلاة التراويح في شهر رمضان.. طبعاً نحن الحينة في عام 1973م.. بو خلف ساكن ويا ولده خلف في بيت عربي في منطقة الحمرية بدبي.. خلونا نسمع سوالف بو خلف ونشوف عن شو يخبر أحفاده
عقب صلاة التراويح.. بوخلف يالس ويا أحفاده في الميلس يسولفون وجدامهم الثريد واللقيمات والهريس والخبيص وعوشه مرت خلف مسويه لهم عصيدة بوبر وهاذيج القهوة المقندة على كيف كيفك وجاهي بالزعفرانبوخلف وهويشرب جاهي: الله يديمها من نعمة علينا
الجميع: آمين
شما: يدي.. يوم تكونون مسافرين في المحمل في رمضان.. شو كنتوا تفطرون؟
بوخلف: والله يا بنيتي ما كنا نسافر في رمضان يطولي بعمرج بس لو صارت لنا ظروف وانجبرنا نسافر ما عندنا غير هالسمج الزين والعيش وماشي غيره
شما: يدي يعني ما كنتوا تسوون لكم لقيمات وخبيص وبثيث؟
بوخلف وهو يضحك: لا يا بنتي ماشي وقت حق هالسوالف.. نضرب من هالعيوش والسمج ونكبر اللقمة قد ما نقدر.. والبثيث ساعات إنيبه ويانا من بيوتنا نحطه في قواطي لكن ما كنا نسويه على المحمل.. أكثر شي كنا ناكل سح.. كان السح بدال الخبيص والعصيدة
سواف: يدي ما تلوع جبودكم كله عيش وسمج؟
بوخلف: هاي رمسة بالله عليك؟.. إنته متى بتتربى؟.. خلوف أبوك ما عرف يأدبك.. إنته تبالك مراغ بهالعصا.
وتم بوخلف يرفع العصا فوق أونه يبا يضرب سواف على ظهره وسواف ركض عند باب الميلس وهو يضحك
سواف وهو يضحك: حرام عليك يدي أنا شوسويت؟
بوخلف: شوسويت ها؟.. عيل نعمة الله تقول ما لاعت جبودكم منها؟.. هاي رمسة ترمسها يا الخايس؟
سواف: والله يدي ما قصدت.. بس صدق اشقايل ترومون كل يوم تاكلون نفس الأكلة؟
بوخلف: نحن في بحر يا الهيس.. شو تتحرا عمرك على البر؟!
سواف: هيه والله صدقت يدي
شما: سواف لا تزعل يدي.. تراني بخبر عليك أبويه
سواف: جب إنتي.. يدي ما يزعل مني أصلاً
شما وهي مسويه عمرها زعلانه وتكلم يدها: يدي تسمع سواف شويقول؟.. قالي جب
بوخلف: هذا خايس.. خليه يولي.. يباله مراغ بالعصا على ظهره
سواف: هيه يدي.. عشان خاطر شموه كل شي بتسوي فيني.. جني مب ولد ولدك
سواف برطم أونه مسوي عمره زعلان.. طبعاً ما هان على بوخلف يشوف سواف زعلان جان يقوله
بوخلف: سواف والله إنكم غاليين.. كلكم غاليين على قلبي.. ما أفرق بينكم.. بس إنته لسانك متبري منك
سواف: طالع عليك يدي
بوخلف: إتخسي يا المهاروم.. عنلاتك يا الخمام.. أنا لساني متبري مني يا جليل الحيا
سواف وهو يضحك: لا يدي.. أسولف وياك
شما: يدي خله يولي.. يالله خبرنا عن سوالف البحر.. إنته أمس وعدتنا
رفيعه: هيه يدي.. يالله أبا أسمع
بوخلف: إن شاء الله.. من عيوني.. بخبركم الحينه. اعتدل بوخلف في اليلسه.. حط تحت إيديه اليمين تكيه اتاجى عليها وقال
بوخلف: صلوا على النبي
الجميع: اللهم صلِّ وسلم عليه
بوخلف: أفلحتوا يا عيالي
شما: تفضل يدي إرمس
بوخلف: أحيد سلمكم الله يوم كان عمري 12 سنة.. كنت مسافر ويا أبويه وسايرين بمبي.. ويوم عدا قريب الظهر سمعت البحارة يسولفون ويقولون إنهم صادوا بنت النوخذة وعقوها في البحر
سواف: أويه.. حرام.. حليلها إشقايل يعقونها في البحر؟
شما: هيه والله يدي صدق إنهم ما يستحون على ويوهم.. شوذنبها حليلها بنت النوخذة؟
رفيعه: يدي.. يدي.. بنت النوخذة يعني بنت أبوك.. يعني إختك؟.. إشقايل عقوا إختك في البحر؟.. وين كان أبوك عنهم؟.. وإشقايل صادوها يعني؟
بوخلف وهو يضحك: يا عيالي.. خلوني أكمل السالفة.. أنا بعد كنت أتحرا جي يقصدون
شما: كمل يدي.. نبا نعرف السالفة كلها
بوخلف: تميت أفكر.. بنت النوخذة يعني بنت أبويه.. يعني إختي عواش!.. عواش عقوها في البحر؟!.. إنزين ليش؟!.. بعدين عواش ما كانت يايه ويانا!.. إشقايل عقوها في البحر؟!.. تميت أفكر وأصيح.. وفي الأخير سمعت واحد من البحارة يقول.. لوشويناها جان زين.. كانت سمينه.. أنا إهنيه انقهرت.. وزغت.. قلت اليوم عقوا اختي في البحر باجر بيعقوني.. قلت بسير أخبر أبويه عليهم
سواف: وسرت؟
بوخلف: هيه سرت.. ويا ليتني ما سرت
شما: شوصار يدي؟
بوخلف: دخلت على أبويه وكان يالس ويا 2 من البحرية يرمس وياهم.. دخلت عليه مرة وحدة جان يطالعني بعيون يظهر منها الشرار وقالي إيه إنته.. شو مدخلنك إهنيه؟.. قلت له.. أبويه.. اختي عواش.. صادوها وعقوها في البحر.. وأنا أخاف يعقوني في البحر.. تم أبويه يطالعني وأنا أصيح وأقوله هيه والله أبويه أنا سمعت البحرية يقولون جي.. جان يعصب علي ويقولي يا الدعمة إختك عواش في دبي ونحن الحينه في البحر.. وين يت اختك عواش إهنيه؟
.. قلت له والله يا أبويه سمعتهم يقولون إنهم صادوا بنت النوخذة وعقوها في البحر.. حتى واحد منهم قال لو شويناها جان زين.. اهنيه تم أبويه يضحك ويتصقع عليّه والبحرية اللي وياه بعد تموا يضحكون وأنا مستغرب اشقايل أبويه يضحك جي وبنته معقوقه في البحر.. جان يطالعني بعينه وقالي.. سلطون.. تباني الحينه أصيد لك اختك عواش؟
.. تعال ويايه.. ويرني من إيديه ووداني عند البحرية وزقر واحد منهم وقاله أباك تعق خيطك واتصيد لي بنت النوخذه.. أنا استغربت.. قلت اشقايل يرومون يصيدون عواش اختي مرة ثانية وهم عقوها؟..
تميت أتصدد وأشوف أبويه واللي وياه يضحكون عليه.. المهم نش الريال وعق خيطه في البحر وتم يتريا جان يصيد أول شي هامور.. فج عنه الميدار وعقه على صوب.. وبعدين عق خيطه واتريينا اشويه و الا صايد شعري.. بعد فج عنه الميدار وعقه.. وتم جي كل إشويه يصيد سمجه لين في الأخير قال حق أبويه.. نوخذانا.. هاذيه بنت النوخذه صدناها.. أنا ركضت بسرعة أطالع أبا أشوف عواش اختي إشقايل صادوها وإلا أشوف سمجه!
الكل إهنيه ضحك
سواف وهو يضحك بصوت عالي: يدي.. يعني بنت النوخذة طلعت سمجة؟
بوخلف: هيه يا ولدي بنت النوخذه هاي سمجه سلمك الله.. سمجة يسمونها بنت النوخذة وأنا أتحراها اختي عواش
شما وهي تضحك: إنزين يدي وأبوك شوسوابك عقب؟
بوخلف: حرج عليّه وقالي لازم تتعلم وتعرف أسامي السمج وأشكالهم وإلا بمدك بالخيزرانه لين ما تموت
الكل إهنيه ضحك
سواف: يدي بس وايد شي أنواع من السمج اشقايل بتروم تحفظهم
بوخلف: إسمعني أبويه.. نحن عيال بحر.. لازم نحفظ أسامي السمج وأشكالهم
سواف: صدقت يدي
شما: إنزين يدي.. قولنا سالفة ثانية
بوخلف: لا بنيتي ما فيني.. خليها لين باجر.. الحينه بأنسدح إشويه بأرتاح لأني أحس بعمري تعبان.. بغمض عيوني إشويه
ونشوا العيال عن يدهم عشان يخلونه يرتاح على أمل إيي باجر عشان يسمعون سالفة يديده من سوالف يدهم بوخلف.