بو خلف ريال شيبة عمره 60 سنة، وعنده أحفاد اللي هم سيف 13 سنة في الصف الأول الإعدادي في مدرسة المهلب وشما 10 سنوات في الصف الرابع الابتدائي في مدرسة آمنة بنت وهب للبنات ورفيعة 7 سنوات في نفس مدرسة شما وهي في الصف الأول الابتدائي وعبدالله 5 سنوات بعده ياهل ما يسير المدرسة لأن هاذيج الأيام ماشي روضة.. بو خلف متعود يسولف على أحفاده اعيال ولده خلف عقب صلاة التراويح في شهر رمضان.. طبعاً نحن الحينة في عام 1973م.. بو خلف ساكن ويا ولده خلف في بيت عربي في منطقة الحمرية بدبي.. خلونا نسمع سوالف بو خلف ونشوف عن شو يخبر أحفاده
رد بو خلف من المسيد عقب ما صلى التراويح هو وسيف وعبدالله ودخلوا الميلس
بو خلف وهو يزقر سيف: سواف.. سواف
سواف: ها يدي
بو خلف: ها؟.. أنا تقولي ها يا جليل الحيا.. يا الحمار و الله لأمرغك بهالمطرق على ظهرك عشان تتعلم إشقايل ترد على يدك
سواف: أوووووه نسيت.. سامحني يدي
بو خلف: جب.. والله ما منكم فايده انتوا الأولاد.. فديت عمتكم شما.. والله إنها شيختكم
سواف: هيه معلوم.. شموه بتمدحها بس نحن لا
بو خلف: هيه بأمدحها.. والله إنها عمتكم.. من أقول لها شما تقولي لبيه يدي آمر
سواف: يدي لازم بتقول لك جي.. إنته من اتسير السوق دومك تتشرالها هي و رفوع وأنا وعبود ما تسوي لنا سالفة
بو خلف: شما ورفيعة عماتكم.. فديتهن و الله.. من أطيح ميهود دومهن يالسات احذالي.. اللي إتيب لي الماي.. واللي تلحفني.. وإلا إنتة وهالحمار عبيد وينكم؟.. إنته ركيض ويا ربعك هالخمة في السكيك وعبيد ورا هالحمام
سواف: شو تبانا نسوي يدي.. البنت لها البيت والولد ما يستوي ييلس في البيت شرات البنات
بو خلف: هيه.. لكن الولد بعد يطيع شور أهله.. ويخدمهم ويوقف وياهم مب طول اليوم في السكيك
سواف: يوم بكبر يدي تراني بأشتغل وبعطي معاشي حق أمي وأبويه
بو خلف: أنا يوم كنت كبرك كنت أشتغل.. أحيد كان عمري 8 سنين يوم أبويه الله يرحمه خذني وياه على المحمل (اللنج) و سرنا قطر.. كنت أشتغل على المحمل حالي من حال البحرية (بحارة اللنج)
سواف: شو تشتغل يدي على المحمل؟.. إنته كنت صغير !
وإهنيه دخلت شما ورفيعة الميلس وسارت شما على طول لوت على يدها و تمت تحبه على راسه و رفيعه بعد سوت نفس الشي وفي الأخير يلست شما على يمين يدها ورفيعة على يساره
بو خلف: فديتكن والله.. يا ربي كم أحبهن هالبنيات
شما: ونحن بعد نحبك يدي
بو خلف: فديتج إنتي.. والله إنج يا شميم صراية البيت.. ما يسوى البيت من دونج
رفيعه: بس شموه يعني يدي؟.. و أنا؟.. خلاص أنا زعلت
بو خلف و هو يضحك: لا فديتج.. إنتي بعد صراية البيت يا رفوعه
استانست رفيعة ولوت على يدها
سواف: والله إنهن دلوعات.. تراك انته يدي مدلعنهن وايد
بو خلف: جب إنته.. عماتك و الله شميم و رفوعه
سواف: إنزين ما قلنا شي.. يدي كمل سالفة المحمل و سيرتك قطر
شما: يدي إشقايل جي؟.. مب انته قلت لي ما بترمس عن سوالف لأول إلا يوم بكون أنا موجودة؟
بو خلف: ما رمست عن شي يا بنيتي.. أنا كنت أعلم هالسبال إشقايل كنا نشقى ونشتغل و نتعب يوم كنا صغار.. مب هو حمار شو كبره و يقول والله يوم بكبر بسير أشتغل.. متى بتكبر يعني؟.. يوم بتشوِّب يا الخمام؟
سواف: يدي أنا أسير المدرسة الحينه.. خلني أخلص من الدراسة وبأشتغل
بو خلف: إنزين.. بنشوف
سواف: يالله يدي كمل سالفتك
شما: يدي قول من أول أنا ما كنت حاضرة أول ما بديتوا
رفيعة: ولا أنا يدي
بو خلف: إن شاء الله.. برد برمس من أول.. أنا كنت أرمّس سواف سلمكم الله عن سيرتي ويا أبويه قطر على محمل يوم كان عمري 8 سنين.. و كنت أشتغل شرات كل اللي على المحمل.. صحيح أبويه كان نوخذا لكن حب يعلمني إشقايل أعتمد على نفسي وأنسى إني ولد النوخذة
شما: يدي يعني كنت تشتغل على المحمل شرات البحرية؟
بوخلف: هيه فديتج.. كنت أنش من الغبشه.. أصلي جماعة ويا البحرية ونبتدي الشغل.. أنا كنت أنظف المحمل.. أخم وأغسل وأوصل طلبات البحرية.. من أصبح لين أمسي على هالحالة.. ما كنت آكل ويا النوخذه كنت آكل ويا البحرية.. في البداية كنت أتضايق وأقول أبويه قلبه قاسي.. ما يحبني.. ليش يخليني جي؟.. وأحيد مرة ياني واحد من البحرية وقالي هات لي جاهي.. حرجت وقلت له إيه إنته.. إنته تعرف تكلم منو؟.. أنا ولد النوخذة.. أبويه كان مار في هاييج اللحظة.. ما وعيت إلا بصفعة يايتني على ويهي والله إني طرت لين آخر المركب من الضربة.. وما سده جي.. نش جان يربطني في الدقل من الظهر لين المغرب.. كنت أصيح أبا قطرة ماي لكن محد كان يرد عليّه.. محد كان يروم أصلاً يعطيني ماي لأن النوخذة الكل كان يخاف منه.. ومنها تعلمت وإتأدبت وتغيرت أحوالي وتعلمت من هالسفرة
رفيعه: يدي.. كانوا يعطونك معاش؟
بوخلف وهو يضحك: هيه يا بنيتي كانوا يعطوني معاش.. أحيدني يوم رديت من قطر كنت يالس في الميلس ويا البحرية و كان أبويه يعطيهم معاشاتهم و أحيد الكراني زقر اسمي طالعني أبويه بطرف عينه و قال للكراني عطه ربيتين.. كانت هالربيتين أول ربيتين أحصلهن من شغلي و الله إني إستانست وايد و أحيدني إشتريت لي صديري لونه بني و نعال
سواف: يدي ما هدمت من البحر؟
بو خلف: أمف يا الخمام.. مب سلطان بن خلف اللي يهدم يا السبال
شما وهي تضحك: يدي لا مب جي.. سواف يبا يقول يعني يوم كنت صغير و أول مرة تمد البحر يعني ما حسيت إنك تعبان أو جي يعني؟
بو خلف: لا بنتي.. لأن نحن اعيال بحر.. طول عمارنا في البحر.. أنا يوم كان عمري 4 سنين كنت أسبح وأغوص ويا عيال الفريج.. أحيدني مرة بس شربت ماي بحر والله آنست عيوني ظهرت لكن تعلمت من هاي السالفة إشقايل أحبس النسم وأتنفس إشوي إشوي وما أخلي الهوا يخلص لين ما أرد أصعد مرة ثانية وأخذ نفس وأرد أغوص
شما: يدي شو من السوالف إستوت لك في البحر؟
بو خلف: يا الله يا شميم.. وايد سوالف وعلوم.. لا تعدين
سواف: يالله عيل يدي خبرنا
بو خلف: الحينه أنا تعبان.. بأرقد إشويه لين وقت السحور.. وإن شاء الله باجر عقب صلاة التراويج بخبركم عن سالفة من السوالف
شما: خلاص يدي عيل بنخليك ترتاح.. يالله قوموا خلوا يدي يرتاح إشويه.. يدي ما تبا تسير ترتاح في حجرتك؟
بو خلف: لا يا بنيتي إهنيه في الميلس بطيح.. إهنيه أرتاح أكثر
سواف: على راحتك يدي.. يالله في أمان الله
بو خلف: الله يحفظك أبويه
ظهروا الأولاد عن يدهم وخلوه يرتاح.. ويتريون باجر عشان يسمعون سوالف يدهم بو خلف .
إلى اللقاء في الحلقة المقبلة