بومحماس شايب روحه شبابية، بيكون ضيفكم يا عيالي خلال شهر رمضان المبارك.
ويستقبل رسائلكم واقتراحاتكم ويتمنى تواصلكم معه عبر بريده الالكتروني... شفتوا شيبة متطورا مثله!
التجوري المسكين
بومحماس ولأول مره خلال العام الحالي يضطر لفتح التجوري، مصاريف ما قبل العيد مش هينة يا عيالي !! البنات يبالهن ماركات من كل شيء بداية من الكلينكس مرورا بالشيلة والعباة وباقي الإكسسوارات والأسعار ما ترحم شيبة فليساته على قده، واذا ما تروم على الماركات عليك بالرخيص والبنت بتلوم بك، منو أغلى عندك بناتك ولا الفلوس !!
فليساتي اللي في التجوري ميودنهن لليوم الأسود وحالات الطواري، ومنعت نفسي وقاومت سيارة البيك اب الجديدة واللي كانت ضرورية للمزرعة !!
علوم يديده يا عيالي، الحين يبوني اييبلهن ثياب وقطع وعطور من برع البلاد ...!! يعني اسافر واودر صيامي وقيامي عسب اغراض موجودة في الأسواق !! وحده من بناتي اتقول يا بويه مش محتاي تسافر والأغراض بتوصلك لين بيتك، بس المشكله يا ابويه ماعندك بطاقة الفيزا !!
احط فلوسي في كرت بلاستيك ...بعدين كيف احسبهن واتأكد ما قصوا علي ؟؟ الفكرة ما دخلت مخي ابصراحه واتحرطمت عليهن .. تبن اغراض ؟ اشترن ولا يعلكن ما اتعيدن!!
طبعا حطيت الكل امام الأمر الواقع، وفلوسي بالتجوري بالحفظ والصون مؤقتا قبل ما تتبخر مع دخون العيد على يد بناتي وأولادي!!
هالمره العيد ما بيعدي على خير !! الدنيا اتغيرت ابسرعه ..كندوره امخصره للأولاد ؟؟؟ شو هالمكر ..اي موضه !! واي تطور لما وليدي بيتخصر باربي ولا سندريلا ؟؟
حسيت في لحظة ان الموضة لو كانت على قيد الحياة، بتكون على شكل واحد مينون ما يعرف شو يسوي والكل يلهث وراه!!
كنادير الأطفال واللي ما تحتاي عباله على الخياط بالسعر الفلاني والسبب القطعه الغالية اللي امفصلة خصيصا للمواطنين في بلاد الواق واق ... واشعنه ما تتفصل في بلادنا وبأسعارنا.. أجود أنواع السفر والملابس مصنوعه في الخارج ...!!
خلونا في المهم يا عيالي، الحين التجوري بيصفر ومب خسارة في عيالي فرحتهم بالعيد... الله يعين اللي عنده عيال فوق العشرة ومتقاعد وراتبه ما يزيد وماعنده مصدر رزق غير معاشه المقسط على البنوك وعياله.
ودمتم بود