بومحماس شايب روحه شبابية، بيكون ضيفكم يا عيالي خلال شهر رمضان المبارك.
ويستقبل رسائلكم واقتراحاتكم ويتمنى تواصلكم معه عبر بريده الالكتروني... شفتوا شيبة متطورا مثله!
أنا ولاّ محماسو..
مرحباً يا عيال.. يوم آخر من أيام شهر رمضان المبارك.. اليوم سامحوني يا عيال مقهور من المحماس ودر القهوة وراح يشرب هالكافتشينو!
ما ايصير يا عيالي انودر اقهوتنا اللي مذاقها يعدل المزاج وايخيلنا انمخمخ المهم.. المحماس ايدح الكافتشينو وماعليه من رمسة ابوه! ماعليك محماسوه جان ما ربيتك ماكون انا بو محماس والأجر على الله... اتريه اللي بييك!
العيال امسوين خيمتهم الرمضانية عدال بيتي وملعب كرة طائرة والكهرباء من وين؟ من بيتي طبعا! قلت في خاطري ليش ما افصل الكهرباء اليوم؟ والموضوع مش نحاسة يا عيالي، المحماس ايتابع مسلسلات رمضانية في اغلب قنوات التلفزيون ويومه ايمر وهو فاج حلجه وامبقق اعيونه ويطالع دون هدف... في البداية همني وقلت حرام اغدي نفس العظم الناشب في البلعوم، بس اليوم زودها والأمور بتفلت من ايدي والمحماس ما منه فايدة لا قرآن ولا صلاة ولا حتى يصك شيء في البيت مرات احتار شو الفرق بينه وبين الطوفة؟
المحماس ياي يتقرقع ويتشكى لي عن الكهرباء المفصولة!، سويت عمري ولا ادري عن أي شيء قلت له يمكن فار دخل ميتر الكهرباء وتفحم واحترق الفيوز و اتصير في أحسن العائلات... وتعرف لو اتصلنا بالكسول راجوه بيي باجر الحبيب ما ايداوم في رمضان في الحر احليله!
ابو الشباب المحماس حبيب الشعب ارتز لي في الصالة وخوز قناة الكرتون عن إخوانه الصغار ويلس ايطالع المسلسل التاريخي «اختطاف العنز»، وهالمسلسل الصراحة تابعت أول حلقتين منه واكتشفت انه ما يتكلم عن أي موضوع، واللي طلع لي ألف علامة استفهام فوق راسي.. المكياج ع الممثلات يعني في زمنهن كان كل هالمكياج موجود! المهم يا عيالي مسكت الريموت كنترول وغيّرت على قناة الواعض وطنشت المحماس اللي كان يتحرقص ومب عارف شو يسوي ولا وين ايروح؟
يعني لها لدرجة إحنا ما نعرف نصرف أوقاتنا ونتريا من القنوات التلفزيونية واللي صايرة مثل البقالات من كثرتها وقلة فايدتها! أتوقع يا عيالي لو تركنا وقت نكتشف فيه أنفسنا بنلاقي المبدع النائم الكبير يتريه حد ايوقضه وينفع نفسه ومجتمعه. المحماس استفاد من الدرس؟ لما عرف اني قطعت الكهرباء بالعمد قال هالشيبة الزط كبر ويخاف على فلوسه... الله كريم شو بنتريه من عيال النسكافية والفضائيات...بس وين بيروح عني؟.
ودمتم بود