شعر: سعد الجميري

قِلْت أنطفي يا كُود أنا ألقاك شَمْعَه

وْقِلْتْ أنْجِرْح يمكن أبالقاك شافي

واثْرِكْ خذيت مْن الذَهَب بَسّ لمعَه

وانا اللي واقف وَسْط الاشواق حافي

صفعه وصفعه من ورا ألف صفعه

قِلْ يا شِعِر كان صْفَعَتْك القوافي

في وسْط خَدّي أكتشف نِصّ دمعه

لا ما لقَت من يمسح بْكَفّ دافي

والله.. ثمْ والله ما قِلْت سَبْعه

بَسْ ما أكَذِّبْك وْيِصِيْر اختلافي

كَنّ المشاعر راحَتْ لْغَير رَجْعه

أو فيك شيٍ عَنّي اليوم خافي

إجْرَحْ إذا لك من ورا الجَرْح نفعه

ولا عاد تنطِرْ مِنّي آقول كافي

ما قِلْت هذا.. لاجل هذا ورَبْعه

قلت أنجِرِح يمكن أبالقاك شافي