ظروفي والله اعْلَم عن ظروفي

دموع العين تمسَحْها كفوفي

أحاوِلْ أخفي العَبْرَه واغنّي

وانا من ضيقتي يزداد خوفي

حزينه والحِزِن مِنّي وفيني

بدنيا ما بها مخلوق يوفي

أعيش بْهَمّ واتْعَذَّبْ واعاني

وانا مْن اوّل أماري في سيوفي

لقيتك يا زمن تقسى عليّه

هواي الهَمّ والبركان جوفي

عليله من ظروفٍ واجهتني

حلفت وآه يا ما اكْثَرْ حلوفي

هقيت انّي باوقِّفْ بالموادَعْ..

قويّه.. بس ما ينفع وقوفي

تفارقنا وْعَنّي راح يمشي

وانا والدَمْع والجَرْح وْحروفي

مشينا وْكل واحد في طريقه

وانا اْمشي عنْه وارْجَعْ له بشوفي

وْخَلاّني على ذكرى حزينه

(فراق أحباب) و (الهَم) وْ (ظروفي)