البارحه هَزَّتْني الذكرى عَ ظَهْر الباخره

لا بارك الله في هجوس الليل يا ساحِل (براغ)

ما ادري وِشْ الطاري لكن الشوق ياللى ذاخره

نادَم هواجيس الخفوق وْكل ما حولي فَراغ

يا صاحبي هذا الغلا المدفون وِشْ هو آخره

لا صار ما يشفي الغليل وْلا شرايين الدماغ

حسيبك الله ما بقى بين العظام الناخره

غير القصيد اللي على لْساني وْعَيَّا لا يصاغ

أموت بك والوَجْد عودك والشِّعر مباخره

وِدّي على كيفي أهوجِسْ بك على هذا الصياغ

ما دامها هذي القريحه بالمشاعِرْ زاخره

تَعَالْ أبَلِّغْك بْمكانك كان ما جاك البلاغ

وانا بدون مْفَاخره يعني بدون مْفَاخره

أقْلِط على جَزْل الشِّعِر واهِجّ ما لا يستساغ

عشانك انته جودة الأفكار جوده فاخره

يوم الخفوق المنْكِسِر مَعَ مرور الوقت زاغ

من هول الايّام التي على جروحي ساخره

إلى متى أسْتِرْ جروح الوقت باطراف الشماغ

يعني على هالحال لو مِثْلي رفَعْ مَنَاخِره

أهْوَنْ وْمِعْيار الكرامه ما نقَصْ لو ربْع صاغ

مِنْذُ زمَن ما زلت في قلبي ليوم الآخره

يعني تأكَّد كل ما دونك فَرَاغٍ في فَرَاغ