البارحة مَرّت الساعات مدبوله
الله لا يسقي الساعات ما امْحَقْها
(راسي مصَدِّعْ ولا فاده بنادوله)
أستأذِنْ الشيخ في الكلْمَات باسْرِقْها
وش حيلة اللي تلفَّتْ ما لقى حوله
غير الوعود البريئه ثمّ صَدّقْها
يا (ماجد) إن كانت الأيام مسؤوله
أنا أعْذِرِك واصْدَقْ الأعذار باخْلِقْها
لكن في خاطري شيٍ أباقوله
والكلمه اللي تزِمّ الصَدْر باطْلِقْها
دام النوايا عن الأنظار مجهوله
ما هَمّني لو وعودك ما تحَقِّقْهَا
خطوَتْك يا صاحبي بالأمس مقيوله
سايِر ولا تدمَحْ الخطوَه وْتسْبِقْها
العَزْم فينا أساس جْهود مَبْذوله
تسقي الأماني عَرَقْ حتى تحقِّقْها
وانا طموحي ينال الغيم وِيْطوله
أنْظِر بعيني لغاياتي والاحِقْها
أسْمَعْ لقول الحكيم وأسْمَعْ حْلوله
والحكمه اللي تناسبني أطَبِّقْها
الناس تشهد على شِعْري وْمَدْلوله
آغَسِّلْ أفكار شِعْري ثم أشَرِّقْها
يا صاحبي كل إنسانٍ له مْيوله
وانا ميولي على الحيطان باصفقها
لكن أمانه وْخِذْها فيك محموله
أمّنتك الله على الكلمه ومَنْطقها
سَلِّمْ على إبْن نايِب رَيّس الدوله
(أحمد).. وقِلْ له معاذيري يصَدِّقْهَا
العِذْر له والسموحه جات مَشْموله
ياليت لي أصْدَقْ الأعذار يَخْلِقْها