الجدار اللي حواني وْفِيه مْن الفَحَم

ذكريات الحبّ الاول تهاوى يا حرام

كنت تشهد يا جداري على عِشْق ازدَحَم

يوم غنّت في ركونك من اشجاني حَمَام

كنت شامخ ما تهزّك سوى جُمْلَة: )إحِم

أعْشِقكْ، حَدّ الثماله ياْ (ساره).. والسلام!!

(ساره) اللي في عروقي لها طَبْعَة وَحَم

جَلّ من حَطَّهَا فِيّهْ قَبِلْ ما انْطِق بعام

وين بابدا في هواها وهو فِيّهْ اقتحم

كل أركاني وْلمْلَمْ جموعٍ من حطام

عن غلاها لو سِفَكْ.. قلْبٍ وْدمّ وْلَحَم

ما باقول إلاَّ فداها على قلبي العظام

يكفي انْ صحراك يا خافقي فيها استحم

كلّما تمطر بصدرك لذكراها غمام

يا جداري وانت أدرى عليها ما دَحَم

لا حكي عاذل ولا من يصفَّفْ لي ملام

من حَرَمْني ركنك اللي تفهّمني وْرَحَم..

خاطري المجبور في أبْسَط أشياء الغرام

ليت ركنك قبل يُنْسَف على جسمي الْتَحَم

كنت باتهاوى معاك في مُلمّات الختام

ما بقى لي لا جدارٍ ولا حتى فَحَم

يفهم اللي يكتبِه ضامري وسْط الظلام