محمد عوض المطيري

قلبي وطَنْ وِضْلوعي الحِدْب حِرّاس

والشوق واللهفه وانا في انتظارك

إقْلِطْ يميّزْك الغلا بين هالناس

ما قِدْمِكْ إلاَّ هَلْك والدار دارك

لا تربكِكْ يا مْذيَّرْ الطبع الاقواس

هذي ضلوعي قُوِّسَتْ من وقارك

والبس قصيدي عقْد فيروز والماس

وامزِج بريقه والبياض وْشِقَارِكْ

وهاك الثنين اللي على الدمث جِلاَّس

وهاك السهام وْليلهن في نهارك

أنّك مشاركني بقلبي والاحساس

يا ليت لو في كل شَيّ نْتِشَارَك