شفت القمر يزحف على شاطي الغيم
والغيم مثل الموج هَمّ وْتلقّاه
يظْهَر ويرْجَع يختفي فيه وِيْهيم
يغشى ركام الغيم والغيم يغشاه
والريح تعزِفْ في دروبه ترانيم
مَرٍ تجيبه ومَرّ بالحيل تشعاه
والليل أرخى من سدوله مراديم
والصمت عَمّ وْعَجَّلْ الليل مسراه
وِنْجوم أخفاها عن الشوف تعتيم
غابت تلاشت في المجرّه مسجّاه
بَدْر وْسما وِنْجومٍ وْعَتْمهْ وْغيم
والكل يسبَح في مساره ومجراه
لوحه تجلَّتْ في حسِنْها التصاميم
آيه من الآيات فيها الفِكِر تاه
عن وصفها تعجَزْ جميع المفاهيم
أبدَعْها رَبّ الكون.. الخالق الله