تشبّث كلّ شَيْ فيني بذكرى من معاناتك
وْرَدَّدْني الأسى بِسْكات وفجأه استنطق آلامي
حبيبي آه لو تدري؟ بأنّي أسْمَعْ سْكاتك
بتقبل دعوتي لْحفلة دموع بْحَضْرة أقلامي؟!
تعال وْبُوح.. شارِكْني وْقَسِّمْ فيني دمعاتك
حرام استوطن بْعِزْله تشتّت واقع أيّامي
تعال وضبّط أوضاعي وعيّشني فيْ وِجْهَاتك
تعبت أسْهر وأستفسر وذاب الفِكْر قداّمي
يقولوا عنّي مرتاحه! تصدّقهم؟ أبي اثباتك
ظنونك للأسف تكبَرْ وتكبَرْ منّها أوهامي
ترى صعبه على قلبي يشجِّعْ عزف وَنّاتك
واذا أقدر أشيل الهَمْ بدالك شِلْته بعْظامي!
بعيد الفَرْح عن روحي تباعَد بِعْد ضِحْكَاتِكْ
ولك خاطر تعاتبني وتنشدني عن أحلامي؟
سرَقْني الحزْن من ذاتي وْذَكَّرني بْعِبَاراتك..
(ما دام اتأزَّم الموقف وجوب الصبر إلزامي)
أزور البحر واتلفَّظْ وجَعْ مَصْدَرْه آهاتك
يحِنّ الموج.. يَغْمِرْني.. يخفّف قسوة أحكامي
وارِدّ البيت واتشبّث بذكرى من معاناتك
وليتك تقبل الدعوَه.. حرام تْشَمِّتْ أقلامي