تسيَّد صوتك أسماعي وصار بْدنيتي طاغي

تسيَّد وامتلا سمعي بعِطْر الشوق وانفاسه

أسِجّ بْدنيتي واسْرَحْ مَعَ صوتك وانا صاغي

أشَرِّعْ للفَرَح قلبي وينسى الصَدْر وسواسه

يراوِدْني صدى صوتك لِسَمْعي دايم يْزاغي

وأنت الغايب الحاضر معاك القلب واحساسه

حبيبي الكون من بَعْدِك أشوفه مِنْعِدِمْ لاغي

لغيته بس لِعْيونك وْعِفْت أحبابه وْناسه

وْكِلّي محتوي حبّك ومن يقوى على افراغي

كبير الحبّ في قلبي حبيبي صَعْب مقياسه

أحِسّ بْكل دقيقة صَمْت صوتك داخلي يْناغي

أحِسّ بْشوق في قلبي قويّه عاليَه اجراسه

لِغِز بُعْدِك يحيِّرْني وْعِجَز يستوعِبْ دْماغي

تغيب بْعيد لكنّه غرامك طاغيٍ باسه

أحبّك وانتظِرْ مِنّك حقيقه وْعَجِّلْ إبلاغي

أحبِّك وانتِظِرْ تَرْحَم محبٍ ضَيَّعْ أهواسه

ذبَحْني حبّك وْشوقي لقلبك ظالمٍ باغي

وما يَعْرِف صروف الحبّ إلاَّ من شِرِبْ كاسه

أسَرْني صوتك الغالي وصار بْدنيتي طاغي

أسَرْني وامتلا سمعي بعِطْر الشوق وانفاسه