تغيب وْخافقي يشكي غيابك والأمل مَحْدود

معاك أعاني الوحده وصمتك ما يداويني

وانا اللّي لا ذِكِر اسمك فرَشْت لْك الزمان وْرود

وشفت أشياء ما صارت سوى في ذهني وْعيني

أصبّ الشوق في كاسك وكاسي خالي وْمفقود

ويبقى ما نقوله صمت والمعنى يسَلّيني

أخالك تعتني حبّي وْتَبْذِل غاية المجهود

تدلِّعني على قَدّي وتشعلْني وتطفيني

مليت أحلامي بْروعة ضياك وْسِحْرك المفرود

وْنِمْت وْراودَتْني منْك بسماتك تناجيني

رحيم وترقي أوجاعي بمَسْحه من يمين الجود

وتهديني الفَرَحْ باوقات فيها الحظ يجفيني

هذيك الليله اللي بِتّ فيها ضايق وْمَحْسود

واقول الله يعَدِّيْها واقول الله يخَلّيني

أأكِّدْ لك حنانك حاطني بِرْعايتك وشْهود

على قولي رسايلْك القصيره لى تحاتيني

قريت الخوف فيها والغلا وِتْوضَّح المقصود

تراك تْوِدّني وِتْخاف لى صَرَّحْت تغويني

تخاف أغترّ واتكبَّر وأنسى حبّنا بِبْرود

تفكِّرني مِثِلْ غيري مَعَ غيري تساويني!

ويوم أكْسِرْ لك الخاطر يفيض الحب مِنْك وْزود

وتنسى انّك تعذِّبني تقوم إلاّ تراضيني