حَسْبك تسيء الظن أو قلبك يْمل

وانا على جور النوى حالتي حال

أنا بوحشه تكبَرْ وْحمْلَهَا حِمْل

يزيد في وقتي على بعدك أوجال

ولا زِلْت شِبْه الطود وان زاد به ثِقْل

متنه ينوض بْحِمْل ترجَحْ به جْبَال

ولا زلت حافِظْ لك ذمامي ولا اكِلْ

ولو تغيَّر حال أو جَدَّتْ أحوال

وحيد من دونك مَعَ الناس والكل

تظن يومي سعْد والليل مَوَّال

ويومي مَلَلْ والليل يمضي على مَهْل

والوقت لى من طال جَرَّعني أهوال

والياس دربٍ ما مشيته ولا ادل

ما دام كلّي لك صبابه وآمال

قلبي مكانك فيه تصعَدْ وْتَنْزِلْ

قلبي ولا غيره محلٍ ومدهال

وغلاك بي يكْبَرْ ولك ذَنْبٍ يْقِلْ

يومك تَرَكْت الطيف للعين مرسال

طيفٍ يشاغبني إلى ميلة الظِّل

ويسْمِرْ على بالٍ دجى الليل به طال

وانا اتوقَّد كل ما به قمَر هَل

راجي وصال الشوق معْ طَلْعَةْ هْلال

وقولي دواليكٍ أيا ليت يا عل

تدني ليال الوصل معْ طيِّبْ الفال

مبطي على هالحال وِشْهوري تْزِل

وانته ولا حَنّيت لي يوم بِوْصال

تعال قَبْل أرجوك دام الرجا ذِل

والذِّلْ مَهْمَا كان عيبٍ لِرَجَّالْ