شعر: محمد خليفة بن حماد

عيشتي من دون شوف الزين صعبه

أشْعِر بالاشياء من حولي تآكَلْ

بس يوم آشوف خِلّي واجْتِمِعْ به

يصٌغِرِنْ في عْيوني كْبَارْ المشاكل

عاذلي لا تحسب أن الحب لعبه

لو عَرَفْت الحب نَكَّلْ بك مناكل

لى شراتي نوم ليله ما هجَعْ به

ولى شراتك نايم وشارِب وماكِل

كان ذوقك طاح!! ذوقي مرتفِعْ به

خَلّني وآنا بأمري ما اتحاكَلْ

أعْرِفْ آهَدِّيْ مسيري واندفِعْ به

واعْرِفْ إش فَرْق التوَكِّلْ مِ التواكِلْ

لكن اللي ما أعَرْفه وْلا اقْتِنِعْ به

بعْد نابي الرِّدْف مسمَرّ العثاكل

إن تدلَّعْ شكله يْليق الدَّلَعْ به

هيكله غير وما هُبْ مِثْل الهياكل

هو حكومة قلبي وْناسه وشَعْبه

في عيوني ما حَد لْوَصْفه يشاكِلْ