اليوم.. بَعْضي (شتات) وبَعْضِي (مْجَمَّعْ)
من ليلةْ البارحه واللى حصَل فيها
جلَسْت أراجِعْ (شريط الفِكْر) واتْتَبَّع
واوقَفْ على فِكْره وْفِكْره أعَدّيها
ْ
حتى شعَرْت إن هَمّي قام.. وِتْفرَّع
ما ماتت عْروقه وْلا مات ساقيها!!
ْ
تجيني مْسَبّباته جَيّةْ مصوّع
واسْكِبْ لها دَمْع عيني.. لاجْل أقهويها
يا حيرتي.. يوم أشوف الناس تِتْمَتَّع
وانا مجَنِّب عن المتعه وْطاريها
ْ
آرِدّ نفسي عن الرغبات واتْمَنَّع
مخافةْ أخْسَرْ محبّه عِشْت أداريها
رغباتي كْثار.. والإنسان يتطمَّع
بس الطماعه.. ياْ حَظّ اللى يخَلّيها
يا لايمنّي.. تمَعَّن زين وِتْطلَّع
إقرا عيوني.. قَبل ماْ الوقت يعميها
بَعْض الملامح لو تْكابِر وْتِتْقَنّع
تبقى تعبِّر عن النَفْس ومآسيها
أبغي أجامل.. واسايِرْ مَعْك.. واتْصَنَّع
لكنّ.. لي العذر باشيا ما أسَويّها
ْ
إن كان ريقك غدى بالماي متشبِّعْ!!
ريقي يبَسْ من تناهيدٍ أقاسيها
هي والله أنّي غديت اليوم متروِّع
أرْسِم وجوهْ التفاؤل.. وارْجَع أمحيها
في الصدْر.. (ضَجّةْ لقا) (وْتلويحةْ مْوَدِّع)
تناقضاتي.. ياْ ليت آعَرْف تاليها
من ماضي الوقت.. لين الحاضر.. أتوَجَّع
والله يستر من أيَّامٍ باقَضّيها!!!
ما اقول عن حالي أنّه حال مِتْمَزِّعْ!!
حالي مجَمَّل.. واْموري رِمْت أمَشّيها
غير البلا.. بين كل اللي به مْولَّع
في خاطري حاجه وْعاجِزْ أضَوّيها!!
ْ
الحظّ كانه نزَل.. بيْكون متسَرِّع
واذا نوى يَطْلَع .. الخطوه يبَطّيها!!
وِدّي أغَلّق دروب الضيق وآشرِّع
دَرْب السعاده واعيش أصفى لياليها
واخِطّ شِعْرٍ يرِيْح القلب.. وآبدِّع
دام أمْلِكْ الكلمه لْزومٍ أوَفّيها
ْ
ما جيت (سوق الشِعِر) شاري وْمِتْبَضِّع!!
جيته مورِّدْ بيوتي مَعْ قوافيها
هُب قصْد للبيع.. لكن حين تتسَمَّع
اللي سمَعْها كأنّه صار راعيها
أقْسِمْ شعوري إلى أجزاء واتوْزَّع
واْسكِن مشاعر.. لحَقْها الموت واحييها
متعوِّدْ أعطي.. ولا ارقب شَيٍ يْرَجَّع
لاْن العطيّه بساطتها تحَلّيها!!
محتار..!! ليش! إن بديت لْنفسي أتشفَّع؟
أرْفَعْ عيوني لفوق.. وْثُمّ أوَطّيها؟!
وْليش إن توَطَّت!! ولا لي نيّه آدمِّعْ!!
عينٍ تبكّيني وْعينٍ أبكّيها؟!
ما دام.. بعضي شتات.. وبعضي مْجَمَّع
معناتها.. دنيتي.. باقي أمَلْ فيها
ْ