يا شوق قَلْبٍ حَدّه الشوق والْتاع
ومن قبل أعَرْفك... ما لابو الشوق داعي
إن جيت لي شِبْرٍ.. تعنَّيْت لك باع
وان رِحْت جِيْتك حافي الرِّجْل ساعي
طَمَّاعْ..؟ يعني تقْدَرْ تْقول طَمَّاعْ
طَمَّاعْ من شفتك ومات اقتناعي
سِقْت الخطاوي مَعْ خطاويك منصاع
وْحَمَّلْت نفسي فوق قَدْر استطاعي
مَدّيت كَفّي طِيْب.. يا ذَرْب الاطباع
وْمَدّيت كَفّك لاجل تَلوي ذِراعي..؟!
يعني عشان عْيونك السود اْلِوْسَاعْ..؟!
والاّ عشان مْحَبّتي واندفاعي..؟
يا عقرب الساعه متى صِرْت لَسَّاعْ..؟!
سمومك أقسى من سموم الأفاعي
ساعة و داع.. ويا ثِقِلْ دَم اْلِوْداع
عانقت حزني حين قال: الوداعي
قَفَّى.. واناظِرْ خطْوته تطوي القاع
ويا كلّ ما يبْعِدْ يزيد التياعي
يا صاحبي.. وش فادك العمر لى ضاع..؟
تعال قِلْ لي.. وِشْ يفيدك ضياعي..؟
غَرّك بأنّك ساكنٍ بين الاضلاع..؟!
وْغَرّك طريقٍ فيه قِلّة متاعي..؟
غَرّك زمانٍ فيه تامِرْ وْتنطاع..؟!
يعني أحبّك.. قلت تغْسِلْ شِراعي..؟!
ضاقت بي الدنيا إلى حَدّ الاشباع
يومٍ تساوَتْ جَيّتي وانقطاعي
ودام الغلا في يوم يشرى وْينباع
طبّ الأماني ما تفيد المساعي
لَبّيه يا شوقٍ لقى الدمع فَزَّاعْ
ولا هِنْت يا دمعٍ يجود وْيراعي
يا قلب بَسِّك تشكي هْموم.. واوجاع
واسْمَعْ كلامي.. لو تحِب إستماعي..؟
إغْنَمْ زمانك واستغلّه.. إذا طاع
وجامِلْ زمانٍ ما تجمَّلْ وطاعي