شعر: سالم الزمر

أمّي ابتساماتي إذا ضاقَتْ الروح

واقفى جميع الناس والناس يجفون

أمّي مداواتي إذا عَنّت جْروح

والناس ما يَشْفُون لو هُمْ يداوون

أمي مناداتي القريبه من البوح

واقْرَبْ مسافه بين قلبي واْلِعْيون

أمّي مناراتي إذا صِرْت مَطْروح

حاير أدَوِّرْ دَرْب والناس يَمْشون

أمّي عباراتي وْعَبْراتي شْروح

والخاطر المَكْسور مَفْتون مَغْبون

أمّي سماواتي وانا سِرْب مَجْروح

روحي بكا وِعْناد لوْ الناس يبكون

أمّي مفازاتي وْغِدْراني تْشُوح

والزاد نافِدْ والسفَر ليس مامون

أمّي سفَر ذاتي إلى الذات وِطْموح

ما ينقصى له حَدّ ما ينتهي عَوْن

وَجْهٍ إذا ما غاب حاضر وْمَلْموح

في كل نبضاتي لها بيت ملحون

أمّي شموخٍ ما تبدّا له سْفوح

ما ينْحِدِرْ عالي ولو هو به طْعون

ما شِفْت لامّي جفن دامِعْ وْمَفْضوح

وْلا شِفْت لامّي وَجْه بالذِّل مَمْهون

ما شِفْت إلاَّ العِزّ في وَجْهها يْلوح

ما شِفْت إلاَّ العِزّ لِثْيابها لون

ترضى الكرامه ثوب لو تلبس مْسُوح

تشرَبْ مَراَر الكاس بالعِزّ مَعْجون

أمّي دواة الروح واشعاري سْروح

أهدي لها من خاطري كَنْز مَدْفون

أمّي شفا روحي إذا ضاقَتْ الروح

بَسْمات روحي يوم الاحباب يَجْفون