شعر: حسين البكري

يختلِقْ لي اْلْف عِذْر اليا سألته عن غيابه

مثل عاداته يقول (انْ حِجّة الغايب معاه)

يا برود أعصاب خِلّي ويا ثِقِل دَمّ الإجابه

ويا سذاجة قِبْح ذَنْبه كل ما برَّرْ خطاه

ويا عناي وْطول بالي يا رتابه في رتابه

آه يا شِحّ الوصال ويا ردى حَظّي رداه

البلا لاصار خِلّك من يقَنّدْك الكآبه

والمصيبه في خفوقٍ ينزِف وْيَحْمِل غلاه

يرحم الله صبر قلبي يا عزاته في مصابه

ويرحَم الله طول بالي كل ما خِلّه جفاه

ما أقول إلاّ عسى الله يمنح القلب الصلابه

ويا عسى لا غاب غالي وابْتَعَدْ.. الله وِيَاه

صِرْت عقْب اليوم ما اسأل عَنْه لو طَوَّلْ غيابه

وْصِرْت ما اصَدِّق مقولة (حِجّة الغايب معاه)