شعر: إبراهيم محمد إبراهيم

على رِسْلِكْ، تمهَّلْ، لا تِغِرّك بَسْمة الأيَّامْ

على رِسْلِكْ أكَرِّرْها ترى الأيَّامْ دَوَّارهْ

على رِسْلِكْ على مَهْلِكْ تَرَيَ تحت التراب عْظَام

تعِدّ أنفاس واطيها.. وتقرا صفحة أفكارهْ

ْ

تمَهَّلْ لا تظن إنِّكْ حقيقه والأنام أوهام

ترى كل (ابن حوّا) وان تغاضى ياخِذْ بْثَارهْ

ْ

يرِقّ الوَرْد لاهل الوَرْد بَس الشوك ما ينلام

إذا امْتَدَّتْ كفوف الشَّر تخْدِشْ رِقَّة أزهاره

تقولْ إنّكْ كبير؟ إكْبَرْ مثِلْ ما تِكْبَرْ الأورامْ

مسير الوقت يا ساهي يسِنّ ضْروس مِنْشَاره

صروح العاج ما تبقى ولا تبقى الخيام خْيَام

تِحَسَّسْ برجك العاجي ترى الأبراج غَدَّاره

ْ

تنفَّضْ من غبار الكِبْر، صَفِّي قلبك اللَّوَّام

واذا ما لامِكْ إشْ تبغي بقلبٍ غابَتْ أقماره

ْ

أنا حَظِّي تبعْثَرْ في الشّقا ما بين (حامْ) وْ(سامْ)

وْحَظٍ بَعْثَرَتْه الريْح ويش يْلِم نِثَّاره

أرى الدنيا بظاهِرْها وخافيها ضغوثْ أحلامْ

سبَقْت اللي تَحدّاني وْترَكْت لْغيري الشَّارَه

أصوغ بْشِعْري قْصوري بلا مالٍ وَلا خِدّام

واسَيِّجْ قلبي وْعيني سِتِر للجَارْ والجاره

ْ

يمرّ العامْ بَعْد العَامْ بَعْد العَامْ بَعْد العَامْ

كبَرْنا وما كبَرْ فينا الطِّفِلْ لو غَيَّر أطواره

رماد النَّار ما تستنهِضَهْ بارودِةٍ وِحْزام

وراعي الثَّار ما تثنيه دون الغاره أعْذاره

ْ

أنا ضْلوعي نَخَلْ (دِجْله) وْزَفْراتي هبوبْ (الشامْ)

وْدَمْع عْيوني النّيلينْ، وْ(صَنْعا) القلب واسراره

(إماراتي) (عْمَاني) (مَغْرِبي) بْدَمّه بصَمْ وابْهَام

أنا اللّي داخِلِهْ غرْبه وكل الخارطه داره

ْ

تريد الصِّدْق؟ هذا الصِّدْق لو هي كِثْرَتْ الأعلام

عَلَمْ واحد بلون الحب يَطْوينا وْنِخْتَاره

حمَلتْ الرّوح في كَفّي على خيلٍ بليَّا لْجَام

وْقِلْت الله مَعِكْ صولي وْجولي اليوم مختاره

ْ