آتهيجن بدورةْ مِغْزَلْ الوَجْد وازْجِل

واجْزِلْ الشِّعر حَدْره تِبْر واعلاه لُوله

ْ

مَعْ حفيف المشاعر للإمام المبجَّل

أرْيَحيٍ مسيِّج في سويداي دوله

ضاع عمري برَمْشه من نِبَا الطَّرْف الانجَل

والرباب أرجهنّ وْزَمْهلَتْنا سيوله

وآنا بين المودّه والوقار المهجّل

لا يسَرْت أعْتِذِرْ له وْلا وِسَعْني قبوله

قلت له مبطي إنّي للطوال آتَرَجَّل

والزِمْ أوساق، غيري لو فطَنْهَا تهُوله

بْدِوِيّه نِثِيّه للصعاب آتمَرْجَل

واخِذْ النوف عنوَه رغم أنف البطوله

جودي إن دَنّ رَعْده واكفه ما تأجَّل

ما تحيَّرْ يَاْ غَيْر الليل يرجي سدوله

عِدّتي في زماني كَفّ بيضا ومنجَل

ومرحبا السَّاع تَنْهِضْ من حجاجي فلوله

ْ

ما اتذَخَّرْ بمطْرَق خيزران وسفَرْجَل

ذِخْري الله وْعِزّي باقتفائي رسوله

شِيْمتي ما تدَرْهِم لى تفزَّعْت بارْجِل

يصْفِقْ جْناح رَفْدي له رفيفٍ وْيوله

من تلحَّفْت شَيْلي ما طفَتْ نار مرجَل

وقايد أركان بنّ الشاذليّات حوله

في رواق أجوديّه ما رفعته بدنجل

رِفْعتِه بالمعالي والكويعب زَهو له

والتَّراحيب يوم أعْقِدْ فِلَلْها تِجلْجِل

تِطْنَخْ بْراس ضيفي قبل يعْقِلْ ذلوله

ْ

بي مواجيب شَرْغَهْ تستحِثّ وْتعَجِّل

ولا عِرِفْت إنني في غير جودي عجوله

ما يعرقل مسيري في العمر ما يخَجِّل

صِعْت روس الطوايل باقتدار وْسهوله

ْ

حرْمَه وْكِحْل ميلي من روابي (طبَرْجَلْ)

هيكَلْ وْروح أنثى والشِّيَمْ للرجوله

يعني بْـ (اْلِعْرِبي) آحِبّ واشتاق واوْجَل

واجْر حِسْن التبَعِّل أحْرِصْ إنّي أنوله

واطْرِقْ بْراحتيني هَنْدسِيّ الزّجَنْجَل

راق طاروق دَحّه ساعدي مَعْ حجوله

بين سِفٍ عتيم وبين طلْحٍ محَجَّل

أفْتِنْ عْويشقي بالثّاملات الخجوله

أنا جنسٍ غريب فْـ (غِينْس) لازِمْ أسَجَّل

وينكتِبْ تحت اسمي شخص يَنْدِرْ حصوله

ْ