(غبيره) يا زمان الشِعْر وِعْروش الصبا والغَي
سلام مْن الحنين اللي نقَل موته على اكتافه
يا حَيٍ كنت حَيّ وْصِرْت في عيني مجرَّدْ (حَيّ)
سِكَكْ ماتت حنين وليل عَرْبَد في السما تافه
سقى الله والقلوب نْظاف وِثْيَابْ النوايا ضَي
مَعَ خِلٍ يخاف مْن الرماد وجمرة أسلافه!
ّ
سقى الله يوم نبغي كل شَيّ وْما تحقَّقْ شَي
سقى الله يوم يشعلنا الغرام وْنَحْرِقْ أطرافه!
ّ
سقى الله يوم جات وكنت أرَدِّدْ هِيّ؟! ما هِيْ هِي !
بغى قلبي يكذِّبْ وَصْفَها من هول ما شافه
وصَل فيها الغَنَج حَدّه وجَتْ تمشي شوَيّ.. شْوَي
وانا خابر حبيبة خافقي عَجْلَه وْخَوَّافه!!
يلاعبها (الهوى) مثل (الهوا) وِتْطيح بين ايدَي
مِثِل غِصْنٍ.. يميل بْه الثَمر لِيْدين قَطَّافه
ّ
توصّيني على عِذْقٍ تساقيه المزون المَي
وانا ماني (حرامي) واعْرِفْ الله زين وآخافه