مبروك يا(الوصل) من قلبي أرَدِّدْها
مبروك مبروك (نادي الوصل) نهديها
(الكاس) و(الدرع) هذي اليوم تحصدها
بالجهد والعزم نلتوها مساعيها
تلعَبْ ولعبك شطاره وانت تسعدها
هذي الجماهير في فوزك نهنّيها
وعَدْت واليوم توفي عاد موعدها
يا فرحةٍ فيك ما شيٍ يساويها
واحلى التهاني لراعي العِز نقصدها
الشيخ (مايد) يلى بْعَزْمه معلّيها
مكانتك فوق في العليا مصعِّدها
(أبو محمَّد) على العدله يمشِّيْها
ياللى وصوفه محال إنَّا نعدِّدْها
وابيات شِعْري محال إنّه توفّيها
حتى المنايا على شانه بنَوْرِدْهَا
تفداه الارواح لى بالفعل غاليها
شيخٍ تميَّزْ بطبعه من مواردها
الاخلاق والطبع والعِزّه وما فيها
من صاحب المجد أبوه الله يسعدها
أيّامه ودوم دنيانا يحلّيها
(مايد) مَعَ (الوصل) رَجَّعْهَا وْعَوَّدْهَا
أيّام عِزّه رْجَعَتْ واحلى لياليها
جينا نهنّيه والفرحه نردِّدْهَا
مبروك مبروك (نادي الوصل) نهديها