يا فكري اللي لا بغيته جاني
أطْرِقْ مواويله واجِر لْحونه
واغْزِلْ نسيج الفكر في تبياني
وافْتِلْ خيوطه فَتْلِةٍ مَقْرونه
واجيبها لوحه بشكلٍ ثاني
كَنْها (دبي) اليوم ذي المزيونه
شكلٍ عجيب ولونها فَتَّاني
كل البنات بْحِسْنَهَا مَفْتونه
فيها من الزين العجيب ألواني
في كل مضمارٍ لَهَا تلقونه
للرايده عصر التقدّم زاني
رِكْبَتْ حصان المجد وارخى ذونه
جا كَسِرْ تَيْم الوقت مَعْه ثْواني
خَلَّى مقاييس الزمن مَجْنونه
روحوا وراكم ما نحِب نْداني
هذا لسان الحال للمامونه
في قلب شيخٍ حبّها مزياني
الله وَهَبْهَا حب نصْب عْيونه
أرخى عليها مَدّة الأيماني
واغْدَقْ عطاها ما ذَخَرْ مَخْزونه
شوفوا (دبي) اليوم هَـ العمراني
صارَتْ مثالٍ يحتذى مَضْمونه
تسْلَمْ يمينٍ عَمَّرَتْ والباني
وِيْعيش فِكْرٍ ما تخيب ظْنونه
بصمه عريضه في الجدار الحاني
أبْعَد مداها صَعْب ما يرقونه
فِكْرٍ لضبط الوضع كالميزاني
وان جات كلمه وانّهَا موزونه
لاهِنْت (بوراشد) و (ابوحمداني)
ساس الكَرَمْ يا سيّدي وِغْصونه
سمعت لك كلمه لها وِجْداني
حَرَّك مشاعر صدري المدفونه
لو كان بِيْد الشخص يعطي عاني
ويفِك ضيقه أو يشِد ظْعونه
يبخَلْ على نفسه بمالٍ فاني
يقصَر عطاه وْمَدّته مَسْجونه
عَز الله أنّه خايبٍ خسراني
يموت ذِكْره قبل موت جْفونه
ما دام ذا مبداك يا الربّاني
حِنَّا بخير ودارنا مَصْيونه
عساك للعليا رفيع الشاني
يا شيخنا لى نايفات حْصونه
فعلك لنا واضح وهالبرهاني
يا قوّ قلبك لِلِّقا وِشْ لونه
مقدام لك صَلْب التقدِّمْ لاني
وْسَبْق الحضاره حافظين رْكونه
الأوّله في الأوّله في الآني
لك الصداره دايمٍ مزبونه
عطيت من وقتك بكل تْفَاني
والله عطاكم مَدّته في عونه
والبذره اللي طَلْعَهَا قِدْ باني
شوفوا عيال العود في قانونه
ما هي غريبه مِكْرِمْ الضيفاني
قِدْمِكْ رجالٍ فعلهم يطرونه
يا الصيرميّ الحر يا كْحيلاني
طلْق الحجَاجْ ورايتك ميمونه
لك العلوم الطيّبه عنواني
ولك المراجِلْ سَيّدي مديونه
لك هيبةٍ يا شيخ في الميداني
وقت اللوازِمْ حَرْبتك مَسْنونه
وأن صَمِّلَتْ عوج الرقاب تْلاني
من سيفك اللي مِدْميات طْعونه
من فعلكم تِتْرَاقَلْ الأبداني
في الحَرْب والاّ في السلام وْشونه
أكْرَمْك رَبّي قوّة الإيماني
وْصَلْب العزيمه مَعْك جَتْ ممنونه
ختمتها يا شيخ بالريحاني
عسى حياتك بالسعد مَقْرونه