شعر: قايد الشريف

يا وَجْد عيني وَجْد بِنْتٍ تَعَزْوى

في وَجْه رَجّالٍ وهو نِصْف رَجّال

ويا وَجْد عيني وَجْد شايب تجَلْوَى

ضَدّوه رَبْعه يوم ما خَلَّفْ عْيال

ويا وَجْد عيني وَجْد شيخٍ تخَلْوى

من بَعْد ما قَصْرِه على الطيب مِدْهال

و يا وَجْد عيني وَجْد بكْرٍ تلوّى

بِيْدين رَجّالٍ إذا قال ما طال

خَذَا شَرَفْها وابتلاها ببلوى

واقفى وهي ترجيه يا رايف الحال

و يا وَجْد عيني وَجْد من هو تبلوى

من بَعْد ما صِحَّتْه يضْرَب بها امثال

و يا وَجْد عيني وَجْد أمٍ تَعَنْوى

بِصْغيرها اللي لا وقَف طاح ما احتال

عليك يا اللي في عيوني تحَلْوى

وكل ما كبرت تْزين وتْزين بِخْبَالْ

يا لذّة السِكَّر ويا طَعْم حلوى

يا منتهى آخر طموحي والآمال

باشْرَب دِلال عْيونها واتقهوى

من رِمْشها اللى قال ثمْ قال ثمْ قال

ما مثلها (غاده) وَلا (هند) و(اروى)

وَلا (تهاني) أو (مشاعر) أو (آمال)

وَلا (أماني) مَعْ (نويِّرْ) وْ(سلوى)

يَسْوون مَعْ (رِفْعَه) ولَو رُبْع مثقال

والله ما ابالغ يوم أنا قلت تسْوى

أو لادي اللي عندي أغلى من المال

تدرون من (رِفْعَه)؟؟ إهي (بنت حوّا)

أنثى ولكن فعْلَها فِعْل رَجّال

هذي هي أمّي خَلِّفَتْ طير شَلْوى

اللي يداريها على كل الاحوال

أحِبّها واعْشَقْ دلَعْها وأهوى

كل ما يجي مِنْها ولَو جات بهْبال

لبّيه يا (رفعه) وانا طير شلوى

يا أمّي اللي تِنْحِسِبْ بالْف رَجَّال