على الله ما تغبّيه الليالي
لو ان صْدوف صَكَّاتْ الليالي
تنصَّاني وانا رَجْلٍ عزومه
يصِدّ بْها النوايب ما يبالي
أفِلّ حْجايه بْوَجْه الكبيره
وتصغَرْ من فضل رَبّي قبالي
واحِبْ الطيْب واللّي يفعلونه
ويرخص من غلاهم كل غالي
ولولا حكمة الله ما خِلِقْنَا
وأمْرٍ قِدْ كتب أوّل وتالي
سألت الله كوكب في المجرّه
جعلت الطيّبين مْن الرجالِ
يحَكْمونه بحكمٍ يهتني به
عزيزٍ من عليه الوقت مالي
واذا قالوا مدوِّرْة السوالف
ترى بعض النظم نَظْمٍ خيالي
باقول الله يجمِّلْ من تجمَّلْ
وانا قَبْل الشِّعِرْ رَجْلٍ مثالي
وانا شاعِرْ قصيدي فيه مِنّي
طموحي واعتزازي واتِّكالي
لكن ياللّي تعذربني تمَهَّل
أنا خوّة رفيقي راسمالي
تنافسني بطول الظِل لكن
ستَر ظِل الشجر ظل الجبالِ
وانا لو اعتزلت الشِّعر لحظه
يموت الشِّعر في يوم اعتزالي
مقامي أشْرَفْ مْن ايّة قصيده
أسَوِّيْها على الدرب ارتجالي
معي ذِكْرٍ عليه أبني حضاره
وانومس به عمامي مَعْ خوالي
ومعي ذِكْرٍ إلى منّه سمع به
من الحكَّام واصحاب المعالي
كريمٍ طِيْب راسه يقتدى به
وَلا يلْحَقْه شَكّ وْلا احتمالِ
تنافسني عليه ويْحتزم له
يدوس المستحيله والمحالِ
تقزّمتُ في عين أقزم مجرّد
كبرتُ في عين كبار الرجالِ
ومتى شَدّوا الرحال آشِد عزمي
وْمتى ما عزّموا.. شدّت رحالي
قدم رجلي على الطرقه ما تتعب
أعَرِّضْهَا على وعْر الجبالِ
معوِّدها على دوس المخاطر
وحملي ما تحمَّلْه الجِمَالِ
وَرَدْت البير وِعْزومي قويّه
تورِّدني طويلات الحبالِ
سليل المجد راع الطيب جدّي
وابوي اللي بنى صرح المعالي
نعِز اللي تذرَّى في ذرانا
يعيش بْوسطنا آمِنْ وْسالي
عرين الأسْد يبقى له مهابه
نزِفّ الروح دونه والغوالي
صغير القوم مِنّا لا نخيته
تنهَّض مثل (أبوزيد الهلالي)
زمان الخف والحافر ثبتنا
وشيّدنا العَلَمْ في راس عالي
بفضل الله في هالكون سِدْنا
نصرنا الله بَعَد عسر الليالي
سفينتنا رغم الاهوال ترسي
بفضل الله وِقْروم العيالِ
عطانا الله من خيره وْجِدْنَا
عطانا عَمّ الاقصى والموالي
تبالي من صروف الدهر قومٍ
ولكنّا.. رجالٍ لا نبالي
لكن نظرات أفكاري بعيده
أبي ذِكْرٍ يسمَّى لي لحالي
طموحاتي كذا والاَّ بَلاها
عزومٍ ما توصِّلْني مثالي
ترى الناس العزيزه يوم تسأل
عن الرجَّال مضمون السؤالِ
تقول الرجل هذا ويش فِعْله
ما هي بَتْقول هذا ويش قالِ
لو ان القوم بالهَرْج اغلبونا
يا بو وجهين رعيان الحلالِ
لكن لا تنفعِلْ يا قلبي اللي
طموحك أكْبَرْ مْن الإنفعالِ