باقتي في عيد حبّك لمّة إحساس ومشاعر
خَذْتها لك من فوادي يانعه صِدْق وْهيام
انتثرها والوَرَقْ لون أحْمَرْ وْحبر الدفاتر
والكلام اللي كتبته (إنت حبّي كل عام)
شوفني بين الزحام فْـ بسمتي تذكار حاير
ضاع بين الصمت وآثَر ما بَعَدْ فصل الكلام
كل ما حوله صَخَب عَجَّتْ به أنظار المحاجر
والمسا مال وْتثنّى واطربه خصر الزّحام
والمكان أنْشَدْ حبيبي وش تراه اليوم صاير؟!
وانت ليه الغايب بْربّك وِشْ أخبار الغرام؟!
شوف بين ضْلوعك العوجا وشوف اشلون باكر
طفلة إحساسك تموت وْتنتهي جدوى الملام
خَذْتك بْقَارب مناي وْجَن مجداف السعاير
ياخذه تيَّارْ هَجْرك وانتهينا والسلام
شِفْ وراك بْدَاخلي مستعمرة ضيم ومقابر
بالله اشلون اقتويت تْسِيْبها نار وْحطام؟!
عيد حبّك ما بقى منّه سوى طيش الضفاير
في عيون إنسان عايش في فضا ذكراك حام
فيني مْن الحزن حِزْن (كْويت) يوم فْراق (جابر)
والله يْجيرك ولادة ضحكتك صارت سيام
الله يْعين المفارق خلّه وْعمره تذاكر
تاخذه لارض العنا من فجره لْحلم المنام
قَنَّدْ دْلاله لاجل تلفيه م الحَسْره عشاير
والعَرَبْ قامَتْ وْتَم الحَظ لا ما يوم قام
يا سفينة رحلتي يكفيك من طرق المناجر
البَحَرْ مِغْزِرْ وحسبي من متاهات المشام