راسي مصَدّع وَلا ينفع بَنادوله
مَا ينفع الاّ القصيده يوم اسوّيها
ومَا كل شَاعِر هَل الآلات غنّوا له
قصَايده تسْتِحِق انّك تغنّيْها
لو كل شَاعِر يهزّ المجتمع قوله
كان استوى عالي القِمّه و وَاطيها
وانا من العَنبَره تطيب لي توله
والمِسْك والعود الازرق في نواحيها
قصيدتي ما تجي والبيت ما اقوله
الا وانا مقتنع في بيتي وْ فيها
منها ملوك الشِعِر في الإنس مَذهوله
ومْلوك جنَّ الشِعِر ماهي تجاريها
وما كل بيتٍ يهزّ القلب مفعوله
يسري بي الشِعر والفكره أسَرّيها
رسايل (احمد) إلى من جات مَرسوله
راضي عليها ونفسي منه مرضيْها
نوادر الشِعر من شرواك مأموله
وبْيُوت شِعْرك على الاوزان بَانيها
وْجَزل القوافي إلى غنّيت مَذهوله
قصيدتك تكْسر الـ (تيم) بْقوافيها
ما فيه بَحْر ٍما تِعْشَق درّه وْ لوله
كل البحور تْشَرّف بك شواطيها
تدنوا لي بْفكرك الموهوب وادنوا له
واعاني مْن الظروف اللّي تعانيها
والجَادل اللّي ينافس كل مَيْدوله
لا عاد تشقيك وَلا عَاد تشْقيها
حياة (قيس الملوّح) يوم لاحوا له
أحْبَابه النّاس لين الناس تحكيها
وْ(جولييت) ماتت بغلطة حب مقتوله
القاتل الحب والغلطه من يْديها
وشلون تلقى بظهْر الحب قيلوله
ما دام عينك لياليها ما تمْسيها
إتعَلّم الحب يا( أحمد ) من اصوله
قدّام سفن الهوى تهْجر مَرَاسيها
إتجيك من خدّها والرمش وسدوله
اللي يميت البشر بامره ومحييها
إلى صفا لك زمانك .. روح بعْجوله
إشرَبْ قبل ما يحوش الطين صافيها
هذا زمان النِعِم والناس مَخذوله
الذيب جايع وشبعانه حصانيها
ومشاعرك في وصوف (اوزان) مقبوله
(أوزان) دايم تهنّيني .. واهنّيها
وْشوط المنافس لها يزهوا وتزهوا له
تقول ..كنّي على الاوّل موصّيها
الفوز ورْثٍ لها من حوله لحوله
الكاس باسم امّها .. والسِّيف لابيها
تسابق الرّيْح لا من جات مَنتوله
مَرّه تقاصر لها وْمَرّه تعَدّيها
مساحة الأرض من عرضه ليا طوله
مَحْصورةٍ بين اياديها ورجْليها
دايم من الزعفران الزين مَبْلوله
لونه من خْدوها لا روس اذانيها
لون الذهب في نحر بنتٍ لها صوله
تَفْرق عن الفاتنات اللّي حَوَاليها
قصيدتي كنّها في الرّيس مَدْبوله
فيها لياقه تغذّيني .. واغذّيها
لا تعَلّل النفس دام النفس مَعْلوله
أسْرَارك ادريبها لو كنت تخفيها
إضْحَك لو النفس بالأحزان مَحْموله
أعْدَاك من ضحكتك تقدر تبكّيها
الانسان دايم حَسَب فكرَته ومْيوله
واهْل المبادي باتنجز من مباديها
والكلمه اللّي على الاسْمَاع مقبوله
أخيَرْ من اللّي بوسط القلب كانيها
ومن يزرع الفول يَجْني حَبّة الفوله
حَسْب ما تزرع يده تطلع مجانيها
أحْدٍ طموحه في مشروبه وماكوله
والوجبه اشلون يطبخها ويشويها
يْحط له خبزتين .. وْشوي تَبّوله
ويْقنّد الراس من فنيال كوفيها
واحْدٍ يطرّى بفعله .. وْوَاحد بْزوله
أداري نفوس ونفوس ٍ ما اداريها
إقلط هنا كلها بوشهاب منشوله
البنت بنتك .. ومن حَقّك تسَمّيها
ناس ٍ تدوّر رضاها الناس وتنوله
لو انّها عَاريَه الافعال تكسيها
وْناس ٍعلى الناس مَحْفوله ومَكفوله
عُرَاه رغم الثياب اللّي يكسّيها
الناس ترثى بعد ما تموت مَعْقوله
وش رايك فْ ناس قبل تموت نَرثيها
واسْطورة المَجْد نائب ريّس الدوله
دَارَه بطاريه فوق السحب طاريها
نظرته دايم على دولته مَشْموله
من بحرها لين مَجرى سيل واديها
كنها مَعَ جَنّة اهل الخلد موصوله
نسخه من الجنّه الخضرا ومَا فيها
صَنَع سموّه من ابداعه ما يسمو له
لو للزمن هامةٍ لرْضاه .. يَحْنيها
كل الخطاوي وَرَا خطوته مَجْبوله
زعيم لان اقْدَمَهْ سَادَت خطاويها
شعر: (فزّاع)