صَوَّرْت بابيات مَبْذوله وْمَغْزوله

لوحَةْ معاني جديده في مبانيها

وخلطت ألوانها باشكال مَجْهوله

إلاَّ عَلَيَ من يِفِكّ الرَّمْز لى فيها

وبريت الِحْروف مَقْلوبه وْمَعْدوله

رَسْم الطَّلاسِمْ ويا ما اوْضَحْ مَعَانيها

وْلَوَّنْتها بين مَنْشوله وْمَجْدوله

ليل الشَّعَرْ في قصيده ذاب راعيها

ورسمت وَجْهٍ عليه النَّفْس مَقْتوله

للظَّبيه اللّى بمعلوقي مراعيها

وْلَوَّنْت حمْرَةْ شفايا ليس مَبْذوله

مِنْ دَمْ قلبي وْخِدود بْلون يدميها

مِنْ سالِفْ الوَقْت والعِشَّاقْ مَذْهوله

وْمن زاره الشّوق حَلَّتْ به بلاويها

والوَقْت مِنْ عادته إنْ غارَتْ خْيوله

يزَلْزِلْ الأرْض عاليها وْوَاطيها

وْبَدْر السِّما كل أهْل الشّوق غَنَّوا له

وْهو ما دَرَيَ بالأغاني وْمن يغَنِّيْهَا

والناس دايم مديم اتْدَوِّرْ سْهوله

والصَّعب له ناس دون إحساس يَشْجيها

والسِّبْع لو حَلِّلَوا صَيْده وْمَاكوله

منْ يقْنِصْ سْبَاعْ لِضْيوفه يعَشِّيْهَا

يا كَم دانه بقاع البَحر مَجْهوله

أغْلَيَ مِِنْ الّلى غدَيَ الطَّوَّاشْ مِِغْلِيْهَا

ولى ما يحَاسِبْ صعوده مَا اسْرَعْ نْزوله

والنَّاسْ بالنَّاسْ أوَّلْهَا وْتَاليها

كَلَّفْت نفسي بشوقٍ ثِقْلَتْ حْموله

وانا الثِّقَايِِلْ على العاده أوازِيْهَا

من لى إذا هو مِشَى تِتْقَارَبْ رْيوله

مَشْي القطاه وْخِفَتْ واخْفَتْ خوافيها

ومن لى بزينه وعينه كَن له دوله

جيشه رموشه وْمن يِيْسَرْ يلاقيها

يا ناعِمْ البَالْ هاني ليله بْطولِهْ

أنا عيوني مَنَامْ الذِّيْب يَضْويها

إذا تِذَكَّرْت مَعْسوله وْمَكْحوله

كَنِّهْ بصَدْري يِشِبّ النَّارْ مِصْلِيْهَا

بذَلْت وِدِّي وْنَوَّلْته ولا انوله

وْرضيت لو بابتسامه بْسِتر يَعْطيها

ولى ما حصَلْ له مِنْ المَحْبوب مَحْصوله

يرضى بَأدْنَى المعاطي لى يلاقيها

مَعْزولَةْ الخصر بالدقَّاتْ مَعْزوله

الخصر وِالْعِنْق بِقْيَاسه يحَلِّيْهَا

ما تشْرَبْ الما وْلَهَا الادْمَاعْ مَبْذوله

والوِرْد وِرْد اليوازي في مفاليها

والقَلْب مِنْها يحيد الوَصل هبْ حوْلِهْ

مَيِّسْ ولا يْمل طاريها وْمواريها

لو بالشجاعه غَلَبْته وْفِزْت في جوله

ما تْفيد فيه اليرَاعَهْ ولا يراعيها

لا العَدْل طَبْعه ولا الرحمات مَبْذوله

وانا على كِثْر ما تَظْلِمْ أحاتيها

يا كَنَّها الدَّهْر في غَدْره وْفِ فْعولهْ

دنيا إتِّقَلَّبْ وْمَجْهوله تِواليها

يا مِهْدي الشِّعْر في أبياتْ مَقْبوله

مِنْ غير عنوان وِصْلَتْ يا مْعَنِّيْهَا

أسْطورَةْ المَجْد مِنْ حمدان مَرْسوله

رَدٍ عَلَيَ احْمَدْ على دوله باهاليها

انتو بدَعْتوا معاني غير مَعْقوله

في السِّنْ هذي معانيكم أحَيِّيْهَا

يا كَنَّها وْرود مِنْ بسْتَانْ مَحْصولهْ

يَكَّاتْ لولو وْجيْوَنْ طاب مِهْدِيْهَا

لكم مِنْ المَجْد ساسه وِبْكمْ الدوله

تفْخَرْ وْيفْخَرْ جميع الشَّعْب لى فيها

مع تحيّاتي