يقول مَنْ عَنَّاهْ شِعْره وْمَعْنَاهْ
واشقاه جَرْحٍ بين الاضلاع صاحي
وِدّي وْتَسْليمي على صاحب الجاه
(مْحَمَّدْ) المبعوث نور الصباحي
أزكى صلاتي ثم تسليمي أزكاه
على بشير الخَلْق داعي الفلاحي
واقولها يا الله يا آه في آه
يا البلسم الشافي مداوي الجراحي
لك من خفوق الروح عَذْب المناداه
أرَقّ من ماي السما والقَراحي
مثل اقحوان البِيْد عقب المطَر تاه
مثل الخزام بْعَابِقْ الريح فاحي
مثل المطَر مَر الظما صبْح واسقاه
واروى قلوبٍ ثم أقفى وراحي
مثل الهبوب اللى من الروض رَيَّاه
ما مَر قلب المشتكي واستراحي
مثل الطيوب العاطره ما ذكَرْناه
إلاَّ وْ مَرَّتْ بي تعَطِّرْ وشاحي
مثل الندى في غصن الارواح مَجْراه
مَر العروق ومَر دامي جراحي
لك من عيون الكون دَمْعٍ مسَحْنَاهْ
باطياف ذِكْرِكْ ما لنا والنواحي؟
إذا ذكَرْنَا سَيِّدْ الخَلْق واغلاه
هانت هموم وْداعي الهَم شاحي
واذا ذكَرْنَا (مْحَمَّدْ الروح) ننساه
جَرْحٍ تِحَدَّرْ في الأضالِع وْطاحي
يا سَيِّدي يا سَيِّدي ما كفَرْناه
فَضْلك ولا عِفْنا دروب الرباحي
لكننا يا سَيِّدي ما حمَلْناه
دِيْنٍ غزينا به بلاد وْنواحي
دِيْنٍ بَلَغْنَا به من المجد أقصاه
فيه افْتَرَقْنا بين مِدْلِجْ وْضاحي
ضَلَّتْ أشياع وصارت الناس ويلاه
ما بين مَتْهومٍ وْجارِحْ ولاحي
راحوا هَل التوحيد والباقي أشباه
أضحوا كما سيلٍ جَرَيَ بالبطاحي
فيه الغِثا واللّى انحدَرْ في دناياه
هذاك (علماني) وذاك (انبطاحي)
وهذاك مِتْشَدِّدْ عطيبه نواياه
وِدّه يضحِّي بي بعيد الأضاحي
يحاسب اللى هو على غير مسراه
وِمْخالفه دَمّه وْماله مباحي
إلاَّ قليلٍ فيهم الخير تلقاه
أهْل العقول الراجحه والصلاحي
اللّي على توحيد الاسلام ما جاه
شِرْكٍ وباقي الدين عَدْل وسماحي
والدِّين عِلْم وكل عِلْمٍ فقدناه!!
ضِعْنا بأدراج الدَّهَرْ والرياحي
والعِلْم نورٍ في الليالي أضعناه
والعِلْم نارٍ مِنْه ماضي سلاحي
والجَهل قَيْدٍ بين الاكتاف ذِقْناه
يا من بنور العِلْم يَطْلِقْ سراحي
دَعْ عَنْك هذا واذْكِرْ اللى طريناه
سِيْدي (مْحَمَّدْ) فَرْحتي وانشراحي
(بوالقاسم) الشافي من الجَرْح ذِكْراه
اللى حديثه في الصباح اصطباحي
اللّي إذا ما مَر بالقلب أحياه
أو مَر بالعاجِز عن البوح باحي
وِدِّه سراجٍ في الخوافي وِقَدْناه
ما ينطفي لو عاصِفْ الريح صاحي
(الهاشميّ) اللّي مِنْ الشين زَكَّاه
رَبّ الخلايق في ثراه انطراحي
(الهاشميّ) اللّي فريده مزاياه
شمس الشموس المشرقه في صباحي
أعلى نسَبْ في الناس مِنْه انحدَرْ ماه
واعلى أدَبْ في الخَلْق مِنْه التماحي
هذا (رسول الله) والله والله
يفنى قصيدي وما وفيت امتداحي
تبقى على شْفَاه الليالي مناجاه
في خاطري له بين صمتي وْصِيَاحي
سِيْدي (مْحَمَّدْ) عاد ذِكْرِه وْطَرْيَاه
ثاني عَشَرْ مِرْبَاعْ الاوَّل ولاحي
في مَوْلِده غَرَّدْ على غْصون دنياه
قلبٍ على سِجَّادة الليل صاحي