شعر: غالب الشريف

هبوب النُّود هبّت والهوى بين الضلوع يْلوب

وصكّات الهوى يا اهل الهوى ما هيب تنطاقي

والى فارت كناين صدري مْن الحَر واللاهوب

ألاحيها.. واناحِر للهبوب تْهِبّ خَفَّاقي

تذكِّرْني.. ولا منّي ذكرت الحب يا المحبوب

ذكَرْتِكْ يا بَعَدْ كل اصدقاي.. وكلّ عِشّاقي

يا ويلي منْك ما شاء الله عليك وْيا عليك إسلوب!

يزَعْزِعْ سطوَة الساطي.. ويِخْلِف هقوَة الهاقي

تراسِلْني.. ولا منّي قريت الخَطّ والمكتوب

تحدَّرْ دمعي.. وْجَرَّحْ خدودي واحْرَقْ أوراقي

تذكَّرْت.. الكلام اللي على راس اللسان يْذوب

تمرّ الكلمه ويبقى صداها داخل أعماقي

بغيت أسلا واقفّي عن دروب أهل الهوى واتوب

وأكَفِّرْ عن ذنوبي وآتلاحَقْ عمري الباقي

لَكِنّك جيت في دربي.. ولحّقْت الذنوب ذْنوب

واظنّك بِتْحَداني للهلاك.. وتقْطَعْ أرزاقي

أشوف إنّك فريد.. وْلا لحَقْك العيب والعذروب

سعيت لكل دَرْبٍ من دروب الخير سَبّاقي

عذولك لو بغى! والله ما يلقى عليك دْروب

أعَرْفِك.. والله انّك ما تَخَالَفْ فيك الاذواقي

تِتَبّعْتِك وَلا حَصّلْت فيك إلاّ ثلاث عْيوب!

تعامِلْك الرقيق.. ومستواك وفكرك الراقي

تواصيفك عَجَبْ! حِسْن وأدَب فتنه وسِحْر قْلوب

خليجي من مواليد (أصفهان). ودمّك (عْراقي)

لو إنّي باقْدَرِكْ والله لاحطّك للحلا مندوب

عشان تْحَرّم اللي مدمنهْ الاسواق الاسواقي

أنا وشلون؟ والاّ كيف؟ أروح بْصوب وانت بْصوب

عقب ما حَنّ رَعَّادي عليك وْلاح بَرّاقي.