ما همّني لو فرّقَت بيننا بْلاد
والاَّ خذتني عن حياتك حياتي
أبْعِد والاقي الشوق في داخلي زاد
أقْرَبْ والاقي ذاتك أقْرَبْ لذاتي
استغفر الله.. يمكن تْقول إلحاد
لو قِلْت بِعْدك قدْ يسبِّبْ وفاتي!!
طيّب سؤال: إرتاح قلبك في لِبْعاد؟
والاّ تعذَّبْ خافقك من شتاتي؟
عَنّي أنا؟ والله (لو رَبّنا راد)
ما أبتعِد إلاّ فيْ لحظة مماتي..!
هذا قرار اللي بها الشوق وقّاد
تموت لِعْيونك أبَدْ ما تحاتي
صارت تعَرْف عْناد ما ينفع عْناد
لأنّ طبعك مِنْخِلِقْ من صفاتي!!
كلٍ ركَبْ راسه وعاند وَلا فاد
قلبك تَرَكْ قلبي وْسَوَّى سواتي
بس النهايَه حبّنا عاد وازداد
لا ما يفرِّقْ بيننا شيّ آتي!!
أكبر دليل بْلاد من بيننا .. بْلاد
وَلا خذتني عن حياتك حياتي..!!