شعر: أحمد بن ظاهر المهيري

يا الله عسى يا الله يتبدَّلْ الحال

والقى الهنا تالي عناي وهمومي

تمضي سنيني ما بها راحة البال

صار الألَمْ والحزن ليلي ويومي

سِبَّةْ ظروف تْجاوزَت وَصْف الاقوال

تقسى ولكن ما ثنَتْ من عزومي

كلْما رسمت لْخطوتي دَرب وآمال

غَطَّى المحال بْجفن عينه حلومي

يا الله لك اشكي وانت عالم بالاحوال

انت العليم بْمَا خفى من علومي

قلبي تجَرَّحْ في حياته ولا زال

كلْ يوم يلقى جَرْح دامي ظلومي

أقْرَبْ قريبٍ صار لي مثلما اللاّل

سراب كلْما جيت صوبه يشومي

حتى السلام اللي من القلب مرسال

أصْبَحْ مَعَ النظرات مثل السهومي

وين الذي كنت أحْسبه شمس وِظْلال

واللّي لأجله كل غالي أسومي

ما عاد يَذْكِرْ رابطتنا ولا يْسَال

وْليته تجمَّل ما يحَرِّضْ خصومي

واقوى الروابط بينها فَرَّقْ المال

مِثْل اللي فَرَّقْ بين عيني ونومي

أمْسي غريقٍ بين لِجَّاتْ واهوال

واصْبِحْ وْكَنّ الموت فَصَّلْ هدومي

لا رَبْع من حولي ولا عَمٍ وخال

ما كَنّي عايش بين رَبْعي وقومي

زادوا على حملي معاناة واثقال

هذا يعاتبني.. وهذا يلومي

كَنّ الظروف تْوَقّفت عِنْد ذا الحال

أو.. من وقَعْ ما عاد يقْدَرْ يقومي

لا والذي عَلَّى سماوات وِجْبَال

ما شي على حاله يتِمّ وْيدومي

لين أمس كنت الما لكم بارِدْ زْلال

وبابقى كذلك مِمْطراتٍ غيومي

يا الله أسالك يا رجا كل من قال

راجيك يا ملجا ضعاف وْقرومي

نفس العزيز إن حَسّت بْضيم واذلال

الموت أهْوَنْ.. وانت رَبٍ رحومي

وِلْكلّ شي عندك مقادير وآجال

وما لي أحَدْ غيرك يفرِّجْ همومي