دام الحبِرْ باقي على صَدْر الاوراق
ما همّني لو يزفر الصَدْر ضيقه
بَعْض الشِعِر سَلْوَه على القلْب لا ضاق
وبَعْض الشِعِر والله ما حَدْ يطيقه
في جفني الأيمَن مشاريه واعواق
وفي جفني الأيسر تشِبّ الحريقه
الدَمْع هايج من ورا سَدّ الاحداق
والنَفْس تزهم سدّها لا تريقه
والهَمّ حَوَّل من على الراس للساق
والدَرْب هذا واضحٍ في طريقه
أقْبَح نصيحه قالها (عْيال الاسواق)
جامِل وَلا تجْرَحْ بقول الحقيقه
من بعدها صدّيت عن رَبْع الانفاق
حتى زِعِل منّي (الخليج).. وْمضيقه
يا لهفة الظامي على حَدّ الارهاق
أمَّا تبيع الشَهْد والاّ تذيقه
بالأمس ناسيني وذا اليوم مشتاق
حَدِّك.. تعال وبِلّ حَلْقي وْريقه
تدري وش أحسن خصلةٍ بين الاخلاق؟!
إنّك تقَرِّب واحدٍ ما تطيقه
وتدري وش أشْيَنْ وَنّةٍ وسط الاعماق؟!
إنك تبعِّد عاشقٍ عن عشيقه
وش عاد لو تدري.. عشقتك..وْتنطاق!
يا اخي حرام أرجوك عطني دقيقه
غرقان في حبّك وفي بَحْر الاشواق
الراس يطفو بس كفّي غريقه
جيتك وانا كِلّي تباشير واشراق
تكفى تلبّي لي مطالِبْ عتيقه!
الاوَّله.. خِذْني مَعَ ريح الاشهاق
والثانيَه.. ضَمّه لصدرك رقيقه
والثالثه عطني من الثَغْر ترياق
والرابعه عطْ عاشقه ما يليقه
شِفْني على صوت التباشير أنساق
ما فيه داعي خَطّ سيري تعيقه
خَلْني أضمّك دام لي صدر ذوّاق
وخَلْني أشِمّ الوَرْد واطعَم رحيقه
وْشارِكْ معي في قًصّة اثنين عِشّاق
خَلّ الرفيق يْنال صِحْبَة رفيقه
وما دِمْت في حبري على صَدْر الأوراق
ما هَمّني لو تزفر العين ضيقه
وما دمت أنا ماني من (عْيَال الاسواق)
قُول الحقيقه لو جروحك .. حقيقه