شعر: عبدالله حمير القحطاني

تضيق فيك؟ وْعِزّة الله وجلاله ما تضيق

ما دامني حَيٍ وراسي عاده يْشِمّ الهوا

تعال وانخاني وْشِفْ كيف أشْعِلْ الدنيا حريق

واعَدِّل اللي ما انْعدَل.. والْوِي لك اللي ما التوى

والله لافْتحْ لك طريقٍ.. ما انْفِتحْ قبله طريق

والله لاروي لك بَحَر.. والله عمره ما انروى

والخوّه اللي ما تجي في وقتها كَمَا يليق

لَوْني مكانِك أعتبرها.. عود رَيَّان.. وْذوى

والصاحب اللي في الشدايد.. دايمٍ وجهه طليق

أخَيْر لك من صاحبٍ يجيك دون المستوى

وان ضاقَتْ الدنيا علينا فْكل بحرٍ له مضيق

وان كل ضيقٍ له فَرَجْ وان كل جَرْحٍ له دوا

وان خاب ظَنّك في الخَوِيّ وْفي الرفيق وْفي الصديق

ترى الأوادم كالأصابع.. دايمٍ ما هُمْ سوى

خَل الذي طيبه هشاش.. ولا لِنجماته بريق

لا بارك الله طَيّبه وْلا بارك الله ما حوى

أقولها وانا مجَرِّب.. والعراقه للعريق

واللي اكتوى باهل الردى.. ما هو كما اللي ما اكتوى

غامَت على عيني سنين.. وْفِقْت فوقَةْ مستفيق

حسبتهم في الجوع زاد.. وفي المظامي لي روى

الين شِفْت عْلومهم ما بين خِيْق وْبين بِيْق

واللي علومه خاويه.. وش ترتجي غير الخوَى

لا تنتظِرْ فَزْعاتهم.. لا صارت الأيَّام ضِيْق

لا تنتظِرْ فزعاتهم.. لا تنتظِرْ ما لِكْ لوى