راية بلادي تشِمّ الغيم وِتْطاله

تلمَسْ جبين الثريّا مَجْد وِتْشِلِّه

تخْفِق وْيَخْفِق معاها قلبي الوالِهْ

لى في غلاها يعيش العمر مِتْوَلِّه

هذا العَلَمْ يا عساني دوم فَدْوى له

عساني دايم تحت ألوانه وْظِلِّه

(أبيَض) فؤاده و(أخْضَر) وارِفْ ظْلاله

و(احْمَر) حُسَامه و(أسْوَدْ) يوم من تَلّه

عالي وكلٍ تَعَبْ يوصَلْه وِيْسَاله

عن مَجْد عالي علوّ النَجْم في حِلِّه

متفرِّدٍ في سماه وْيَخْفِقْ لْحَاله

شامِخ ولا احْدٍ قدَر بالعِز يوصَلْ له

في هَالعَلَمْ كل مَجْدٍ طيّبٍ فاله

والدار هذي سكَنْ فيها الوفا كلّه

هذي (الإمارات) دار العِز وِعْيَاله

يا بَخْت من هو عَلَمْها دايم يْشِلِّه