تحلى القصايد والكواكب سِريَّات

بين الثريَّا وارتفاع الميازين

وما بين نَعْش وْفِرْقِدٍ شاعرٍ بات

يطوي حروفه والخوالي خِليِّين

يا ليل سَجِّل في سطور المجَرَّات

وارْسِمْ جمان الدر بين العناوين

وارْفَعْ مكاتيبٍ بها شوق وابيات

وارْسِلْ مَعْ الأبيات ريح الرياحين

مَعْها نسيم الشَّرْق شَل البشاشات

والسعد والترحيب مِنّي ملايين

يا شيخ ياللي لك مَعْ العَزْم وَثْبات

متميِّزٍ بالطايله في الميادين

وْفِكْرٍ بعيدٍ ما تحدّه مسافات

ورايٍ سديدٍ بارزٍ بالبراهين

إن قِلْت شاعر ترفَعْ (النِّعْم) رايات

فوق الصواري في بحور الدواوين

ربّانٍ يْسَاني على (هَيْر) دانات

يا راية المرزم عَنِهْ لا تغيبين

وان قلت (بو راشد) تجاوبني أصوات

راعي الهمم نجل القروم السلاطين

لاجل المعالي ما تهم الصعوبات

دون الطريده ما ترِد الشواهين

وانته زَرَعْت البَحْر شِعْر وْعبارات

حتى رفَعْت (دْبَي) بين البلادين

وْخَلّيتها تسبي العيان الدعيّات

وْلَبّسْتها أغلى العقود المثامين

حَتَّى غدت درّه عروس الإمارات

تبهِر بها العِشَّاق وِتْشَوِّقْ العين

يا رب يا منشي المزون الثقيلات

تسقي فلاها بالحيا كل يومين

وِيْتِمْ لين يْبَان للصيف شارات

طَلْع الثريَّا وارتفاع الميازين