مذهله والله (محمد) وَقْفِتِكْ للهَدَفْ

حَطّه (اسماعيل) في المرمى (العماني) خطير

أسْمَعْ (اسماعيل) يصْرَخْ يا (خليفه) شَرَفْ

ذا شَرَفْ لي يا خليفه فَرْحَتِكْ يا أمير

لي شَرَفْ لي يا (محمَّد) يوم مثلك وقَفْ

وَقْفِتِكْ هذي (محمَّد) فيها معنى غزير

فيها معنى للمحبّه للذي ما عَرَفْ

معنى حب الدار للي صار فهمه كسير

فيها معنى لاحتضانك للبلاد بْشَغَفْ

فيها معنى من سماتك والمعاني كثير

وْصَفْقِتِكْ والله (مْحَمَّد يا بن زايد).. حَلَفْ

قلبي اللي هو يجلِّك صَفْقِتِكْ لِيّ غير

صفقة العاشق لِدَاره من شِرِبْهَا غَرَفْ

من ثراها وْعَذْب ماها يوم توَّه صغير

ويا (خليفه يا بن زايد) شوف هذا طَرَفْ

من محبّتهم عِيَالِكْ لك صغير وْكبير

من محبّتها بلادك يا شموخٍ عِطَفْ

يا سلامٍ كم تبدّا في صباحٍ منير

يَا عَلَمْ كم هو تمايل فوق شامِخْ وْرَفّ

فوق هاك الزَّنْد الاسمر فيه خيرٍ وفير

ما يوَفّي بعض قدرك من طراك وْوصَفْ

ما يوَفّي بعض حَقّك لو بحبّك نطير

يا بلادي يا إماراتي يا طَرْفٍ ذَرَفْ

دمعة الفرحه العزيزه من صباح الضمير

كم نحبّك يا بلادي حب ما ينوصف

يا بلادي كَم نحبّك ما لحبّك نظير

يا بلادي يا إماراتي يا داري وقَفْ

كل قولٍ أقوله شفت قوله عسير