شعر: ضاحي خلفان بن تميم

فازوا وْقَبْلك ما يفوزون

إلاَّ انْت مِنْ جِيْت الحُكومه

قدومِكْ مْبَارَكْ وْمَيْمون

يا ليث في قِمَّةْ عزومه

شَرَحْت لْهُم شُو يسوّون

وكيف الأسَدْ شَرْسٍ هجومه

السَّبْق لِكْ يا شيخ مضمون

والنّصْر لِكْ مَعْقود دومه

هِديتْ لِـ (خْليفه) عَلى الكون

فوزٍ ملا الدّنيا علومه

الشَّعْب يَا (مْحَمَّد) يهنّون

نَصْرٍ على فالِكْ قدومه

لاجْل الوطَن العمْر تعطون

وتاريخنا انتو نجومه

صِنْتوه وْنِحْنا حَقّه نْصون

مِنْ كل أضْغان وْخُصومه

عَهْدٍ لكُم يا شيخ مَرْهون

والشَّعْب وَثَّقْهَا خُتومه

لِ عْيونكم كل غالي يْهون

يَا اهْل الأحاسيسْ الرُّحومه

وَعَدْت أنَّ النَّصْر بَيْكون

وآخرْ يَناير كان يومه

سَجَّل (مطَرْ) مِن فَنّه فْنون

(قولٍ) ولاَ حَدٍ يرومه

سلامْ لِكْ ألفينْ مَلْيون

وِلْرَيَّسْ الدّوله لزومه

في مْسِيْرة الإبداع تمشون

شوف التفوّق في عمومه

في دارنا نَهْضَاتْ تَبْنون

وهذا البِنَا انْتو قرومه

فازوا وْقَبْلك ما يفوزون

إلاَّ انْت مِنْ شِلْت الحكومه

قدومِكْ مْبَارَكْ وْمَيْمون

يا ليث في قِمَّةْ عُزومه