للشِّعر في راسي وساع الفضاءات

وفكري يجول بْهِنْ على ماهوى له

قصايدي هِنْ في حياتي محطَّات

وانا عن الخذلان أبغي الجماله

مرّات أأجِّز جيش فكري وْمَرَّات

أعطي له إستنفارٍ وْرَفْع حاله

أبات مَعْ الابيات في خِذْ لك وهات

والشِّعر صيد وكل شاعر بفاله

ويا الله بفالٍ ما تلاوِحْه خِلاّت

واقول باسم الله وابدا المقاله

لكن قبل إمّا اتعمَّق في الابيات

ما ادري لمرسال الفكر وِشْ جرى له

بعض الأمور تْريد دِقّة حسابات

خِصْ القصيد اللي تبى ينصغى له

وقصيدتي هذي من الذات للذات

عنوانها رمز الشموخ وْمِثَاله

ما تنهدى إلاَّ لراعي المروَّات

(بوراشد محمد) عريب السلاله

لكن يا اصحاب العقول الفهيمات

شِ الراي في نظمٍ نباه ايعنى له

أبطيت وانا ابْحَثْ عن أجْزَلْ عبارات

كلما يجي بيتٍ أدَوِّرْ بداله

حتى قواميس النظم لِعْربيَّات

نَخَلْتِهِنْ نَخْل الذَّهَبْ من رماله

ولا طَلَّعَنْ لي منّهن غير كِلْمَات

ما يوصفن خصله من أصغر خصاله

لانّه جَزِلْ وافعاله البيض جَزْلات

والجزل ما يستهال إلاَّ الجزاله

إسمه يسلِّط للقصيده الاضاءات

وينومِسْ الجمهور طاري فعاله

بين الأمم وامّا اصْنَعَتْ من حضارات

(بور راشد) مْصَنِّعْ حضاره لحاله

يقْدَرْ يجَزّئ لك حياتك جزيئات

ويقْدَرْ يخَلّيها بخير وسهاله

محيط وِيْغَرِّقْ كبار المحيطات

وْوِشْ المحيط اللي بيوقف قباله

مواقفه داخل وخارج (الامارات)

تقول: ما للمجد إلاَّ رجاله

والمجد ساسه طِيْب والطيْب نِيّات

تحرّك العزم وْتِشِدّ إنفعاله

والجود والرحمه والاقدام شِيْمَات

يوهبهن الخَلاَّق جَلَّ جلاله

شروات ما هو واهبنّه وشروات

ما نوّله كل الذي قِدْه ناله

هيبة مقامٍ طايلٍ باثر طولات

ومحبّة قْلوبٍ ربت في ظلاله

وِنْضوج فكر وكبر هِمّه وجرءات

وقوّة حضور وْوِسْع صدر وثقاله

يعني رجل من سابع المستحيلات

يرجع قبل ما يْحَقِّقْ اللي في باله

واكْبَرْ دليل يْدِلّكم واكْبَرْ إثبات

زخم النماء المِنْبِلِجْ مِ الأصاله

تكاثف إنجازات تتبع نجازات

والدار تشهد له بما هو سعى له

و(دبي) خَلاّها ولا في الخيالات

حتى على ماها كتَبْ له رساله

أمانه وهو قَد حمْل الأمانات

(راشد) أبوه (وزايد) العود خاله