يا عونة الله .. متى بَتْفَيَّقْ لْعمري

وابْدِلْ ضجيج الهموم بْهَدْو الاوناسي!!

أشْعَلْت عمري لنَفْع الغير من صِغْري

من يوم حَطّيت شَيْلَتْيِه على راسي

ولا ألْحِقْ المنتِفِعْ مِنِّيَّةْ الكِبْرِي

نَفْع الرضا هوب من نَفْع التنحّاسي

وان ضِقْت ضيقي حبيسٍ في قفَصْ صَدْري

ما للعَرَبْ ذَنْب في ضِيْقي وإحساسي

ما وِدّي إنّي أحَزِّنْ حَدّ من أمري

لو في القصايد يثير الحزن هوجاسي

دَسّيت حزني في روحي بَس في شِعْري

عَبَّرْ عن إمّا أدِسِّه فوق قرطاسي

من أوَّلْ الجرح لآخر دمعي النثري

ما كان غير القصيد مْوِد وِمْواسي

أفضيت به كلّ حلمٍ مَرّ بي زهْري

لو آخره مُرّ .. يفضي بي على ياسي

والليل وحده مداد الشِّعر لو تدري

والهَم والغَم والخذلان كرَّاسي

أكْتِبْ.. واحِس الكتابه في دَمِي تَسْري

فيها كآبة عزاء .. وفرحة أعراسي

بعض القصايد يجي مفعولها سِحْري

وارَقّ مِ الوَرْد .. لكن وَقْعها قاسي

أقْبَضْ على الجمر .. من يقبَضْ على الجمري؟!

واتوسَّدْ الدمع .. وارضي الناس .. واواسي

أحيان بعض المواقف ما لها فَسْري

وتبقى علامات الاستفهام في راسي

وانْظِرْ بعين التأمِّل والتزِمْ صَبْري

ما عَلّموني على سَبْق الحَدَثْ ناسي

لو قِلْت ما قِلْت .. لا تشْرَهْ .. معي عِذْري

صار أكْثَرْ الهَم .. هاجوسي وْ وِسْواسي

أدْفَعْ فواتير هذا الصبر من عمري

واتْوَسَّدْ الدَّمْع . وارضي الناس .. واواسي