لا تْلعَنْ الفقر يا الشاعر ولا تشْرَهْ

رسول الامّه فقير وْمنهجه سامي

لو كل واحد حزين تْحِدّه العَبْره

لقيتني أبكي ظْنوني على اوهامي

لكنّي اصبر على الشوق وعلى أمره

واصِد عَنّه حبيبي لو أنا ظامي

أسابِقْ اليوم من فجره إلى عَصْره

واحَلْف واللّه ما تَسْبِقْني أيّامي

أستثمر أخطاء هذا اليوم إلى بكره

عَشَانْ ما تِتْعَبْ مْن أحلامي أقدامي

والحب جَمره على جَمره على جَمره

والبُعد عن من تحب المِيْسَمْ الحامي

والزين ما هو بْزين الخَد والبِشْره

الزين زين الخِلِقْ والعاتق السامي

مْداعبات القصيد المَرْنه الخَطْره

تنشّط الدَّمْ بي وِتْزيد بالهامي

قِدْ قال (شيخ الشيوخ) اللي سبَقْ عصره

(يا مرحبا يا معنّي خَط الاقلامي)