يا سَنَا الشَّمْس وِعْيوني وْبَدْر البدور
إجمعيني بكلمه يكفي (أحْمَدْ) شتات
لاجل فَلْذات كَبْدِكْ لى بعمر الزهور
لاجل خاطر (مْحَمَّدْ) واشتياق (البنات)
لملمي قلب ابوهم ضمّي اصْدَقْ شعور
واصْدَقْ احساس ضَمّك بين مهجه وذات
قبل ما اموت واجْرَحْ فَرْحهم والسرور
أو يموتوا.. على ابوهم ألَمْ وِحْسَرات
الجفا هَد حيلي والليالي تجور
وبين عيني ونومي جَرْح بِعْدِكْ يبات
صِرْت اشوف المباني والمزاهر قبور!!
في غيابك تساوَتْ دنيتي والممات
أيش يرضيك منّي لك أمِد الجسور
أدْفَعْ العمر واشري مِنْك بسمة شفاة
وكان تبغي اعتذاري في جميع الأمور
أعْتذِر لك.. وْمِتْأسِّفْ بكل اللغات
وادري انّك سلالة وافيين الشبور
فيك أسمى المعاني وفيك عَذْب الصفات
لو ذنوبي كبرها كبر بَر وْبحور
لاجل خاطر عيالِكْ قَدِّمي تضحيات