شعر: هجوس

اسمي (هجوس).. وجيت أهوجِسْ لحالي

وآخِذْ تلابيب الشِّعر جَمْع وارباع

من مُوقدٍ يصلى ومن وَقْد صالي

يتلاه من بين المعاليق لَسَّاعْ

في مجتمَعْ أصْبَحْ من الصِّدق خالي

وِتْغَيَّرَتْ فَ.. اهْله مفاهيم واطباع

الأوّلي أصْبَحْ مَعْ الوقت تالي

واللي بطَى يْحَافِظْ على طيبته ضاع

والّلي يصيح اليوم وا عزّتالي

يغْبَن ولا يلقى من الناس سَمَّاعْ

والسَّمْت هذا الوقت ما له مجالي

يوم العَرَبْ أضحوا مريحين واشْباع

لا شيمةٍ تحمى ولا لوم عالي

إلاَّ البرود اللي سكن هِدْف الاضلاع

أنْظِرْ بعين الحَق وارْسِلْ سؤالي

من هو الذي يَطْعِم قصيره إذا جاع؟

من هو يراعي حال أمّ العيالي

من عقب موت اللي معيلٍ وْنَفَّاعْ؟

قليل في هالوقت من هو يبالي

واللي يحِسّ بْضيق غيره والاوجاع

هواجسٍ مِتْواليه في خيالي

تاخِذْ من الواقع براهين واقناع

مستثنيه مِنْهَا القروم الغوالي

وآخِصّ حَدّ وْحَدّ ما اجَمِّعْ إجماع