ما يرْبِك الليل هَمْس وهفهفة شَمْعه

هالليل باله طويل.. ويشبهه بالي

لا تنْفِضْ غْبار صَمْتٍ تخنقه دمعه

ترى ضجيج الغَضَب يستاذِنْ هْبَالي

دخيل أمٍ بكَتْ طفلٍ.. بلا رَجْعه

دخيل كَهْلٍ يصيح عْيَالي.. عْيَالي

دخيل قَرْمٍ تعثَّر وِهْربوا رَبْعَه

وسْط الوغى ينتخي يا خيبة رْجَالي

دخيل وَجْه الدخيل اللي يبي فَزْعه

خَلّ المواجِعْ تقلِّب حالها وْحالي

لا توقِظْ الآه دام الجَرْح في هَجْعه

غيرك عجَزْ وانكسَر ما كَسَّر أغْلالي

حِلْم الفقارى تعلَّقْ في رجا زَرْعه

لا هي ثْمَرَتْ قَمْح.. لا هي عَذْربَت فالي

الغِصْن لو ينحني ما غَيَّره وَضْعه

صعب يْتِنَكَّرْ لجذعٍ واقف قْبَالي

عَلَّمْت نَزْف الجروح ان الصَبِر شرْعه

أمّا حياةٍ تسِرّ.. أو موتي أشوى لي

ياما شحَذْت الكَرَمْ لين انتهى نفعه

وياما كَرَمْت الكَرَمْ وِاكْرِمْت غربالي

وياما تعشَّمْت وَجْهٍ من طَرَفْ صبعه

يقدَر يغيِّرّ دروبٍ ترفض ظْلالي

غَرّتني وْجيه واسما للردى سَنْعه

ما تشبه إلاَّ آثَارٍ في خطى رْمَالي

ما دِمْت تنفِضْ غبار ومقصدك دمعه

فابْشِرْ ضجيج الغَضَبْ استاذَنْ هْبَالي