شعر: نيافه

بَعْض البشَر كبير جداً.. لانّ ما حوله كبير

مثل القصير اللي مَعَ الأقزام طالَتْ هامته

قِسْ الكبير مْعَ الكبار وْقِسْ صغيرٍ مَعْ صغير

لا غَرّك اللي في سِرا الاطفال يَسْمِك قامته

يعني إذا صارت (حرير) و(صوف).. نختار (الحرير)

لكن حريرٍ مَعْ حرير.. الفَرْق جودة خامته

يا سَيّدي كان اختيارك سهْل من بين الكثير

قبل الهوى في القلب يا عمري تقوم قْيَامْته

كنت مْتِمَيِّزْ عن مناعير الرجال.. وكنت غير

واختارك القلب وْفَرَدْ .. لِعْيونك إبتسامته

هذا ورغم ان الهوى عَفْوي.. وتحديد المصير

من اختصاصات القدَرْ.. وانا احْتِرِمْ صَرَامته

لكن أنا روحي.. تجاذبها القناعات وْتسير

وِتْقَدِّمْ لْمِحْرَابها.. من يستحق إمامته

دَلْو العواطف تَجْذبه يَد الهوى.. من جَم بير

ويرقى قراح الحب.. بِحْبَال القلوب الصامته

تستقبلِه أفواه عِشَّاقٍ مجفِّفْهَا الهجير

لين الظما رام الحناجِر والحناجِر رامته

كاسه يعدّى للقلوب اللي تشوم وْتستخير

ما هي قلوبٍ لا لقت كاس الحثاله هامته

يا سَيِّدي عَدّيت لي كاسك.. وجا في الأمر خير

مَعْك افْطِرَتْ نفسٍ نَهَارْ العمر كلّه صامته

أنْعَشْتني يا نفحة العود المعتَّقْ .. يا سفير

جَلالة الحبّ الأصيل.. وْمنتهى فَخَامته

ما اخترتك إلاَّ لاْنّ ما لك في تواصيفك خشير

والعين قَرَّتْ بك بليل العاشقين.. وْنامته

من وين جيت؟ بْلا انتظار.. وْصِرْت شيٍ ما يصير

يا مرحبا باللي لفى.. وْحَمْداً على سلامته

إفْتَحْ شبابيك الغلا.. خَلّ الستاير تستذير

قِدَّامْ يَخْتِلْهَا الغبار اللي رسَمْ.. علامته

وافْرِدْ ضلوعي يا سحاب الوسم.. واقْسِمْ لي غدير

قلبي تحت هَتَّانِكْ.. وْعيني على غمامته