بين القوافي وبين الافكار خلوه

يِقْرَعْ جَرَسْهَا خافقي ما يخَلِّيْه

أسوقها من واحة القلب نقوه

باقات وَرْدٍ للأجاويد مِهْديه

سلام ما تِقْدَحْ على الأرض حذوه

وما هَبّ نسناس الصبا من مغانيه

وما يشدو الشادي بمَوَّال شَدْوه

وما شَنَّفْ السامِعْ وْحَرَّك دواعيه

سلام (بو راشد) صباحٍ وْغَدْوه

مع كل نسمة ريف رَيَّا كواذيه

خير الرجال وراس لِقْروم عِزْوه

شيخٍ سليل شْيوخ بالفخر طاريه

من لابة (المكتوم) يوده ونخوه

الجود من كَفّيه شَرَّعْ سواقيه

يمناه مَدَّاده ويسراه رَهْوه

من شيمته يمْن الشمايل معاطيه

البحر له مَدٍ وْجَزْرٍ وْغَفْوه

والسيل ع الهجران عادت مياريه

إلاَّ أنت يا شيخ العَرَبْ بحر صحوه

مَدٍ بلا جَزْرٍ ولا حَد يجاريه

كل شي قالوا له نهايه وْبَدْوه

إلاَّ الطموح اللي بفكرك تغذِّيه

ولولاك وَقَّفْ ما مشَى ربع خطوه

غارت نجومه واسْتخلَّت مباديه

عسى حياتك في هَنَا العيش صفوه

وعمرٍ مديدٍ ما تكدّر لياليه